Палука әлемнің үздік қақпашыларын атады

Италия ұлттық құрамасы мен Миланның "Интер" клубының бұрынғы қақпашысы Джанлука Палука қазіргі футболдағы ең үздік қақпашылар тізімін жариялады. Ол өзінің рейтингінде италиялық қақпашы Джанлуиджи Доннарумманы да енгізген.

"Менің ойымша, әлемдегі ең мықты қақпашылар – Доннарумма, Эмилиано Мартинес және Тибо Куртуа. Италия футболында жақын арада "Кальяри" клубының қақпашысы Элиа Каприле, сондай-ақ Карнезекки мен Ди Грегорио өз ойындарымен мені қатты таңғалдырды.

Бірақ ашығын айтқанда, олар 1990-жылдардың қақпашыларының деңгейіне жете алмайды, бұл мүлдем басқа деңгей", – деді Палука pianetamilan.it сайтына берген сұхбатында. Естеріңізге сала кетейік, Джанлука Палука өз футболшылық мансабын 2007 жылы аяқтаған.