Доннарумма: АПЛ-ға бейімделу оңай болмады

«Манчестер Сити» қақпашысы Джанлуиджи Доннарумма Англияда өткізген алғашқы айлары туралы ойларымен бөлісті. «Қалалықтар» 26 жастағы қақпашыны қыркүйектің басында ПСЖ клубынан сатып алған еді.

«Мен бастапқыда Премьер-лигада осынша пайдалы боламын деп ойламадым. Алайда, командаластарым маған үлкен көмек көрсетті – олар мені керемет қарсы алды.

Әсіресе, командаластарымның көмегі алғашқы ойын кезінде [«Манчестер Юнайтедке» қарсы], яғни Англияға келгенімнің келесі күнінде өткен матчта аса маңызды болды. Бірінші жаттығуда-ақ өзімді екі жыл бойы командада жүргендей сезіндім.

АПЛ-де мүлдем басқа жағдайлармен бетпе-бет келдім: өте қарқынды футбол, көп жүгіруді талап етеді. Бейімделуіме тура келді», – деп Доннарумманың сөздерін «City Xtra» басылымы жеткізді.

Италиялық қақпашы «Манчестер Сити» сапында 12 ойын өткізіп, бар-жоғы 7 гол жіберген.