Transfermarkt Роналду құнын өзгертпеді

Жыл соңында Transfermarkt сарапшылары футболшылардың трансферлік бағаларын белсенді түрде жаңартуда. Осы орайда «Аль-Наср» клубы мен Португалия ұлттық құрамасының шабуылшысы Криштиану Роналдудың да бағасы қайта қаралды.

Алайда 40 жастағы футболшының болжамды бағасы өзгеріссіз қалып, 12 миллион еуроны құрады. Еске салайық, 2024 жылдың соңында Роналдудың Transfermarkt рейтингіндегі құны 15 миллион еуродан 12 миллион еуроға дейін төмендеген еді.

Содан бері бес мәрте «Алтын доп» иегері болған шабуылшының бағасы екі рет қайта сараланғанымен, көрсеткіш өзгермеген. Жазда Роналду «Аль-Наср» клубымен жаңа келісімшартқа қол қойған болатын.

Келісім 2027 жылдың ортасына дейін жарамды. Сонымен қатар, бір апта бұрын Лионель Мессидің трансферлік бағасы күрт төмендегені жайында хабарланған.