«Бавария» Упамеканомен келісімнің созылуын сағызға теңеді

Мюнхеннің «Бавария» клубының бас атқарушы директоры Ян-Кристиан Дрезен француз қорғаушысы Дайо Упамеканомен келісімшартты ұзарту үдерісінің созылып кеткенін ерекше түрде түсіндірді. Бұл туралы euro-football.ru хабарлайды .

Клуб басшысының айтуынша, футболшының жаңа келісімге қол қоюды кейінге қалдыруы сағыз шайнауды еске салады.

«Сағызды ұзақ шайнасаңыз, ақырында дәмі кетеді. Сондықтан бұл істі де сағыздай созбау керек», — деп Дрезеннің сөзін T-online келтірді.

Оның айтуынша, Упамекано клубтың ұсынысынан әлдеқашан хабардар, алайда «Бавария» шексіз күте алмайды.

Қорғаушының қолданыстағы келісімшарты 2026 жылғы 30 маусымға дейін есептелген. 2025/2026 маусымында француз футболшысы 21 матчқа қатысып, 1 гол соқты.