Рафинья: «Барселона» өткен маусымдағы нәтижені қайталай алады

«Барселона» вингері Рафинья Диас Испания Суперкубогының финалында «Реалды» жеңгеннен кейін команданың маусымдағы мүмкіндіктері туралы пікір білдірді. Бұл туралы euro-football.ru хабарлайды .

Бразилиялық футболшы «эль класикода» «кілегейлілердің» қақпасына екі рет гол соғып, «көк-анар түстілердің» биылғы науқандағы алғашқы жүлдені алуына маңызды үлес қосты. Финал 3:2 есебімен аяқталды.

«Біз өткен маусымдағы жетістікті қайталай аламыз. Команданың едәуір есейгенін көріп тұрмын, одан да мықты болу үшін бәрі бар. Өткен маусымда қол жеткізгенімізді қайтадан орындай аламыз — бұл көбірек өзімізге байланысты. Біз толықтай шоғырландық», — деді Рафинья финалдан кейінгі сұхбатында.

Еске салайық, 2024/25 маусымында «Барселона» Испания Суперкубогын, ел кубогын және Ла Лиганы жеңіп алды, ал Чемпиондар лигасында жартылай финалға дейін жетті.