Англиялық шабуылшы Джейдон Санчоның «Боруссия Дортмунд» клубына қайтуы барған сайын айқындала түсуде. Sky басылымының хабарлауынша, футболшының өкілдері мен германиялық клуб арасында жаңа келіссөздер жүргізілген. Қазіргі уақытта «Астон Виллада» жалдау негізінде өнер көрсетіп жүрген 26 жастағы вингер Дортмундқа қайту ниеті бар екенін клуб басшылығына мәлімдеген. Бұл туралы Goal.com хабарлайды.
Тараптар жеке келісімшарт шарттарын талқылауға кірісті. Санчо «Манчестер Юнайтедте» алатын жылдық 15 млн еуро көлеміндегі жалақысының айтарлықтай азаюына келіскен. «Боруссия Дортмунд» басшылығы бірнеше апта бұрын футболшыға қаржылық шектеулер туралы ескерткен болатын. Санчоға «Ювентус» сияқты клубтардан ұсыныстар түскеніне қарамастан, ол дәл осы Бундеслигаға қайтуды жөн көріп отыр.
Санчоның «Манчестер Юнайтедпен» қазіргі келісімшарты осы маусымның соңында аяқталады, сондықтан неміс клубы трансфер үшін ақы төлемейді. Футболшы 2021 жылы 85 млн еуроға Англияға аттанған болатын, алайда ол жақта күткендегідей ойын көрсете алмады. Жаттықтырушы Эрик тен Хагпен туындаған келіспеушіліктен кейін, ол 2024 жылдың қаңтарында Дортмундқа уақытша қайта оралып, команданың Еуропа Чемпиондар лигасының финалына шығуына көмектескен еді.
«Боруссия Дортмунд» бас жаттықтырушысы Нико Ковач Санчоның трансферін қолдап отыр. Хорватиялық маман футболшының тәртібіне қатысты мәселелерге қарамастан, оның талантына сенім білдірді. Санчо командадан кетеді деп күтіліп отырған Юлиан Брандттың орнын басуы мүмкін. Клубтың спорттық директоры Ларс Риккен атап өткендей, командаға сапалы әрі қаржылық тұрғыдан қолайлы шабуылшы қажет.
“Zamin”-ді Telegram-нан оқыңыз! 
