Airbnb компаниясының негізін қалаушы Джо Геббиа АҚШ үкіметінің цифрлық платформаларын жаңғыртуға бағытталған U.S. National Design Studio жобасы аясында танымал дизайнер Питер Арнеллді алғашқы бас бренд-архитектор ретінде жұмысқа алды. Бұл туралы Геббиа The Wall Street Journal ұйымдастырған «Future of Everything» конференциясында мәлімдеді. Бұл туралы Techcrunch.com хабарлайды.
Питер Арнелл өзінің қырық жылдық мансабында Samsung, Pepsi, Reebok және Chrysler сияқты әлемге әйгілі брендтермен жұмыс істеген. Енді ол АҚШ үкіметіне қарасты 27 мыңға жуық веб-сайттың дизайны мен пайдаланушылар үшін ыңғайлылығын арттыру міндетін атқарады. Мақсат — мемлекеттік қызметтерді жеңілдету және азаматтардың үкіметтік платформаларға деген сенімін нығайту.
Джо Геббиа бұл процесті Airbnb платформасын құрудағы тәсілмен салыстырды. Оның айтуынша, күрделі мемлекеттік процестерді Airbnb сияқты қарапайым, қауіпсіз және түсінікті ету — басты міндет. Қазірдің өзінде команда зейнетке шығуға байланысты қағазбастылық процестерін цифрландырып, бірнеше айға созылатын жұмысты бірнеше минутқа қысқартуға қол жеткізді.
Жобаның тағы бір маңызды тұсы — пайдаланушы интерфейсіндегі (UX) кемшіліктерді жою. Геббиа үкіметтік сайттардағы күрделілікті «ең нашар UX үлгілері» деп атады және адамдар мемлекеттік қызметтерді пайдалану кезінде өздерін еркін әрі ыңғайлы сезінуі керектігін атап өтті. Команда сайттардағы артық қадамдарды қысқарту арқылы цифрлық мемлекеттік басқаруды жаңа деңгейге көтеруді жоспарлап отыр.
“Zamin”-ді Telegram-нан оқыңыз!
