Илон Маскқа тиесілі SpaceX компаниясы Техас штатының Граймс округінде жартылай өткізгіштер шығаратын ірі зауыт салуды жоспарлап отыр. Жоба аясында бастапқы кезеңде 55 миллиард доллар, ал жалпы алғанда 119 миллиард долларға дейін қаражат жұмсау көзделген. "Terafab" деп аталатын бұл кешен тік интеграцияланған, озық есептеу технологияларына негізделген өндірістік орталық болады деп күтілуде. Бұл туралы Techcrunch.com хабарлайды.
Бұл бастамаға Tesla компаниясы да ресурстарымен қатысады. Сондай-ақ, жобаға чип өндіруші алпауыт Intel де тартылған. Ынтымақтастықтың басты мақсаты — жасанды интеллект серверлері, спутниктер, ғарыштағы деректер орталықтары, сондай-ақ Tesla автономды көліктері мен роботтары үшін қажетті чиптерді әзірлеу.
Илон Масктың айтуынша, қазіргі жартылай өткізгіш өндірушілері оның компанияларының қажеттілігін қанағаттандыруға үлгермей жатыр. "Біз не Terafab-ты салуымыз керек, не чипсіз қаламыз", — деп жазды миллиардер әлеуметтік желілерде. Оның айтуынша, зауыт болашақта жылына 1 Тераватт қуатқа тең чиптер шығару қуатына ие болуы тиіс.
Қазіргі уақытта Граймс округі осы зауыт үшін қарастырылып жатқан бірнеше аумақтың бірі болып табылады. Бұл жоба xAI компаниясының Grok жасанды интеллект модельдерін оқыту үшін жеткілікті есептеу қуатын қамтамасыз етуге бағытталған. SpaceX және xAI біріккен құрылымының нарықтық құны 1,25 триллион долларға бағалануда және компания маусым айында IPO-ға шығуды жоспарлап отыр.
“Zamin”-ді Telegram-нан оқыңыз!
