SpaceX компаниясының Starlink спутниктік интернеті өз мүмкіндіктерін кеңейтіп, кәдімгі сымды интернет провайдерлерімен бәсекелесе алатын деңгейге жетті. Speedtest деректері бойынша, 2025 жылдың төртінші тоқсанында АҚШ-тағы пайдаланушылар үшін медиандық жүктеу жылдамдығы 132 Мбит/с-қа жетті. Салыстырмалы түрде, бір жыл бұрын бұл көрсеткіш небәрі 64 Мбит/с болған еді. Бұл туралы Ixbt.com хабарлайды.
Қазіргі таңда Starlink пайдаланушыларының шамамен 45 пайызы АҚШ реттеушісі «қалыпты интернет» деп санайтын 100 Мбит/с жүктеу және 20 Мбит/с жіберу жылдамдығына ие. 2025 жылдың басында мұндай нәтижеге қол жеткізген абоненттер үлесі небәрі 17 пайызды құраған болатын. Бұл өсім SpaceX компаниясының орбитадағы спутниктер тобын 10 мыңға дейін жеткізуі және Falcon 9 зымырандары арқылы жүзеге асырылған 120-дан астам сәтті ұшулармен байланысты.
Естеріңізге сала кетейік, 2023 жылы АҚШ Федералдық байланыс комиссиясы (FCC) Starlink-ке 886 миллион долларлық субсидияны беруден бас тартқан еді. Сол кезде реттеуші қызмет жылдамдығы талапқа сай емес деген уәж айтқан болатын. Алайда, қазіргі техникалық көрсеткіштер бұл шешімнің асығыс болғанын көрсетіп отыр.
SpaceX болашақта Starship зымырандарының көмегімен жаңа буын спутниктерін ұшыру арқылы жылдамдықты одан әрі арттыруды жоспарлап отыр. Компанияның ұзақ мерзімді мақсаттарының қатарында гигабиттік жылдамдыққа жету және тікелей смартфондармен байланысу мүмкіндігін ұсыну бар.
“Zamin”-ді Telegram-нан оқыңыз!
