"Өзбекстан-2030" стратегиясының жобасында халыққа ыңғайлы, жедел және түсінікті мемлекеттік қызметтерді ұйымдастыруға, барлық үдерістерді толық цифрландыруға және артық құжат айналымын күрт қысқартуға бағытталған кешенді шаралар белгіленген.
Жобада атап өтілгендей, 370-тармақ аясында Өзбекстанның БҰҰ-ның Электрондық үкіметті дамыту рейтингінде "Топ-30" қатарына кіруіне қол жеткізу негізгі мақсат ретінде қойылған. Сондай-ақ 371-тармаққа сәйкес электронды түрде көрсетілетін мемлекеттік қызметтердің үлесін 90 пайыздан асыру жоспарлануда.
Азаматтардың өтініштерімен жұмыс істеу және бақылау механизмдерін нығайту мақсатында 372-тармақта "Халықтық бақылау" порталы әр аймақта 100 пайыз енгізілуі көзделген. Сонымен қатар, 373-тармақ бойынша тек Бірыңғай интерактивті мемлекеттік қызметтер порталы арқылы көрсетілетін қызметтердің үлесін 50 пайызға дейін жеткізу міндеті белгіленген.
Сондай-ақ мемлекеттік қызметтерді заманауи форматта ұсыну бойынша жаңа мақсаттар белгіленуде. Атап айтқанда, 374-тармақта композиттік және проактивті түрде көрсетілетін мемлекеттік қызметтер санын кемінде 400-ге жеткізу жоспарланған. Бұл, қарапайым тілмен айтқанда, азаматтар жеке-жеке жүгірмейтін, қызметтер "өздігінен" шешілетін жүйені күшейтуді білдіреді.
Цифрландыру бағытында 375-тармаққа сәйкес, қолда бар 40 миллион құжаттың 25 миллионын цифрландыру міндеті қойылды. Сонымен қатар, 376-тармақ аясында "Цифрлық үкімет" жүйесінің бірыңғай платформасына қосылған сервистер санын 700-ге дейін жеткізу, құжаттар мен қарым-қатынастардың цифрлық түрде болуын қамтамасыз ету жоспарлануда.
Қызметтердің сапасы мен жеделдігін одан әрі арттыру үшін 377-тармақта 100-ден астам мемлекеттік қызмет көрсету мерзімін 50 пайызға қысқарту көзделген. Сонымен қатар, 378-тармақта 500-ге жуық мемлекеттік қызмет көрсету процедураларын жеңілдету жоспарланған. Яғни "қағаз-қағаз" деп жүйкені жұқартатын кейбір кезеңдер азаяды деп күтілуде.
Сондай-ақ 379-тармаққа сәйкес мемлекеттік қызметтердің 40 пайызын жеке секторға беру көзделген. Архив саласындағы қызметтерді кеңейту бойынша 380-тармақта архив саласындағы мемлекеттік қызметтер санын 14-ке дейін жеткізу міндеті белгіленген.
Қысқасы, жобадағы бұл жоспарлар жүзеге асса, мемлекеттік қызметтер "кезек-мөр-ксерокопия" кезеңінен шығып, шынымен де жылдам, ыңғайлы және цифрлық жүйеге айналады деп күтілуде.
“Zamin”-ді Telegram-нан оқыңыз!
