22 қаңтарда Өзбекстан президенті Шавкат Мирзияев Швейцарияның Давос қаласында "Бейбітшілік кеңесі" жарғысына қол қою рәсіміне қатысты. Шараға АҚШ президенті Дональд Трамп төрағалық етті.
Салтанатты шараға Аргентина, Армения, Бахрейн, Болгария, Индонезия, Иордания, Марокко, Моңғолия, Әзербайжан, Парагвай, Пәкістан, Қатар, Қазақстан, Сауд Арабиясы, Түркия, Венгрия және басқа да елдердің басшылары, премьер-министрлері мен сыртқы істер министрлері қатысты.
Бастаманың мәні және Өзбекстанның ұстанымы
Президенттің баспасөз қызметінің мәліметінше, "Бейбітшілік кеңесінің" құрылуы Өзбекстанның бейбітшілікті нығайтуға, көпжақты ынтымақтастықты қолдауға бағытталған сыртқы саясатының басым бағыттарына сәйкес келеді.
Мәлім етілгендей, жаңа құрылым БҰҰ Қауіпсіздік Кеңесінің резолюциясымен қолдап-қуатталған Газа секторындағы қақтығысты тоқтату бойынша кешенді жоспарды жүзеге асыру аясында құрылуда.
Газа үшін жоспар және "Жаңа Газа" идеясы
Хабарламада айтылғандай, "Бейбітшілік кеңесі" қақтығыстың шиеленісу қаупін азайтуға, Газа секторында экономикалық және әлеуметтік қалпына келтіру үшін қолайлы жағдай жасауға бағытталған.
Бұл, өз кезегінде, гүлденген экономика мен бейбіт өмірге сүйенген "Жаңа Газа" құру, болашақта Палестина мемлекетін құру мүмкіндігін кеңейтуі мүмкін екені атап өтілді.
Өзбекстан құрылтайшы мемлекеттер қатарында
Ақпаратқа сәйкес, кеңес құрамына әлемнің түрлі аймақтарынан беделді және ықпалды көшбасшылар кірген. Ережеге қол қойылуымен Өзбекстан "Бейбітшілік кеңесін" құрған мемлекеттердің біріне айналды.
Президенттің баспасөз қызметінің мәлімдемесінде бұл қадам еліміздің кеңестің қызметіне дәйекті түрде қатысуға, құрылтайшы мемлекеттермен және халықаралық серіктестермен тығыз ынтымақтастықта оның өкілеттіктерін іс жүзінде жүзеге асыруға дайын екенін білдіретіні айтылған.
