Өзбекстан тарапынан Иранға гуманитарлық көмек жеткізілді

Өзбекстан үкіметі тарапынан Иран халқына гуманитарлық көмек жеткізілді. Бұл туралы Өзбекстан Сыртқы істер министрлігінің баспасөз қызметі ресми түрде хабарлады.

Хабарлануынша, гуманитарлық жүктің құрамына азық-түлік өнімдері, оның ішінде ұн, күріш, қант, макарон өнімдері, күнбағыс майы, түрлі консервілер, сондай-ақ дәрі-дәрмек пен медициналық құралдар кірген және олар Иран тарапына жеткізілген.

Гуманитарлық жүктi қабылдау рәсiмiне Дарегаз қаласының әкімі Мужтаба Базмара, Иран Сыртқы істер министрлігінің Хорасан-Разави облысындағы өкілдігі басшысы, министр кеңесшісі Али Масумифар, сондай-ақ Иранның Түрікменстандағы елшісі Али Мужтаба Рузбехани қатысты.

Іс-шара барысында жауапты тұлғалар гуманитарлық көмек және Иран халқына көрсетілген назар үшін Өзбекстан Президентіне шынайы алғыс білдірді.

Сондай-ақ бұл бастама екі ел арасындағы достық, ынтымақтастық және өзара қолдау дәстүрлерінің жарқын көрінісі екені атап өтілді.