Шавкат Мирзиёев Боғимайдондағы абаттандыру жұмыстарымен және халықтың өмір сапасымен танысты
Фото: Президент баспасөз қызметі
23 сәуір күні Өзбекстан Республикасының Президенті Шавкат Мирзиёев Ташкент қаласының Мирзо Ұлықбек ауданында орналасқан Боғмайдан махалласында жүзеге асырылған ауқымды құрылыс-жөндеу жұмыстарымен танысты. Бұл сапар махаллаларды кешенді дамыту және халық үшін лайықты тұрмыс жағдайын жасау бағытындағы реформалардың нақты нәтижелерін көрсетті.
1987 жылы негізі қаланған бұл махаллада бүгінде 41 көпқабатты үй және 1 990 пәтер бар, онда 5,5 мыңға жуық тұрғын тұрады. Соңғы жылдары өңірде жүргізілген абаттандыру және жаңғырту жұмыстарының нәтижесінде махалла заманауи әрі жайлы тұрғын жайға айналды.
Атап айтқанда, тұрғындар, соның ішінде жастар мен балалар үшін кең мүмкіндіктер жасалған. Аудан аумағында 20 балалар ойын алаңы, 11 воркаут аймағы, 3 мини-футбол алаңы және теннис корты салынған. Сондай-ақ, екі мектепке дейінгі білім беру мекемесі 500-ге жуық баланы қамтыған, бұл махаллада білім мен тәрбиеге үлкен көңіл бөлініп отырғанын көрсетеді.
Махаллада экономикалық белсенділікті арттыру және халықты жұмыспен қамту мәселелері де назар орталығында. Бүгінгі таңда мұнда 70-тен астам кәсіпкерлік нысаны жұмыс істейді. Жастарды жұмыспен қамту саласында да оң нәтижелер байқалуда — 1 048 жастың 949-ы жұмыспен қамтылған, бұл осы бағыттағы атқарылып жатқан тиімді жұмыстардың дәлелі.
Өңірде 2022 жылы құрылған экобақ тұрғындардың тынығуы мен табиғат аясында уақыт өткізуі үшін жайлы орынға айналды. Сондай-ақ, «Ардақтылар мекені» (Nuroniylar maskani) орталығының жұмысы махалла өмірінде маңызды рөл атқарып, аға буын өкілдерінің белсенді қатысуын қамтамасыз етуде.
Президентке махаллада қауіпсіздікті қамтамасыз ету бойынша енгізілген заманауи шешімдер де таныстырылды. Атап айтқанда, тұрғын үйлердің кіреберістері бейнебақылау жүйелерімен және күзет пульттерімен жабдықталған. Адамдар мен автокөліктердің қозғалысы заманауи цифрлық технологиялар арқылы үнемі бақылауға алынған. Бұл тұрғындардың тыныштығы мен қауіпсіздігін нығайтуға қызмет етеді.
Мемлекет басшысы махалла тұрғындары үшін жасалған жағдайлармен таныса отырып, махалла белсенділерімен және ақсақалдармен жылы шырайлы сөйлесті. Ол абат және көркем махалла қоғамның берік тірегі екенін атап өтіп, тыныштық, бірлік пен әлеуметтік ынтымақтастықты сақтау әрқашан басым міндет болып қала беретінін қадап айтты.
Сапар барысында Президент махаллада өтіп жатқан сумалақ сайранына қатысты. Мұнда ол махалла тұрғындарымен, әсіресе жастармен және балалармен емен-жарқын әңгімелесіп, ұлттық құндылықтарды сақтау мен буындар арасындағы сабақтастықты нығайтудың маңыздылығын атап өтті.
Сондай-ақ, спорт алаңында жаттығып жатқан жастармен кездесуде дене шынықтыру мен салауатты өмір салтының адам дамуындағы орны ерекше екені айтылды. Президент жастарды белсенді болуға, спортпен шұғылдануға және салауатты өмір салтын таңдауға шақырды.
Тұтастай алғанда, Боғмайдан махалласының мысалында атқарылып жатқан жұмыстар қала ортасын жақсарту, халықтың әл-ауқатын арттыру және заманауи өмір сүру стандарттарын қалыптастыру бағытындағы реформалардың тиімділігін айқын көрсетіп отыр.
