Eldor Shomurodov: “Rostov” chempion bo‘lishiga ham, O‘zbekiston Jahon chempionatiga chiqishiga ham ishonaman”

  • 11 oktyabr 2019, 22:55
  • 791
  • Sport
  • Eldor Shomurodov: “Rostov” chempion bo‘lishiga ham, O‘zbekiston Jahon chempionatiga chiqishiga ham ishonaman”
    “Rostov” safida Rossiya premer-ligasida ajoyib sermahsullik namoyish etayotgan O‘zbekiston terma jamoasi hujumchisi Eldor Shomurodov so‘nggi oylarning eng asosiy mavzusi bo‘lib turibdi desak mubolag‘a bo‘lmaydi.
    Futbolchi Toshkentga kelganidan foydalanib unga bir qator savollar bilan murojaat qildik.

    - Rossiya premer-ligasida “Krilya Sovetov” hujumchisi Aleksandr Sobolev bilan gol urish bo‘yicha poyga ketmoqda. Bu bir vaqtlar Ispaniya chempionatidagi Lionel Messi va Krishtianu Ronaldu o‘rtasidagi poygaga o‘xshayapti deb o‘ylaysizmi?
    - Yo‘q (kuladi) ular butunlay boshqa darajadagi futbolchilar. Albatta poyga qiziq ketmoqda deb o‘ylayman, Aleksandr uchun ham, men uchun ham. Sobolevning barcha gollarini ko‘rib borayapman.

    - SSKA bilan uchrashuvdan keyin Xoren Bayramyan intervyu berdi va Karpin bilan garovda yutganingizni aytdi. Agar garovni yutqazganingizda sochingizni oldirib tashlashingiz kerak ekan. Shu gaplar rostmi yoki hazilmidi?
    - Rost edi. Agarda SSKA bilan o‘yinda men va Bayramyan gol urmaganimizda, unda ikkalamiz sochimizni oldirishimizga to‘g‘ri kelardi. Chunki o‘tgan gal FIFA kunlaridan keyin klub ixtiyoriga qaytganimizda, bosh murabbiy Karpin men va Bayramyan bilan garov bog‘ladik. Ya’ni, keyingi tanaffusga qadar men 3ta, Bayramyan esa ikkita gol urishi belgilandi. Agarda bu vazifani uddalay olmaganimizda, unda ikkalamiz ham sochimizdan voz kechishimizga to‘g‘ri kelardi. SSKA bilan o‘yinda esa biz vazifani uddaladik. Aks holda bugun terma jamoa ixtiyoriga boshqacha imijda tashrif buyurardim (kuladi). Agar biz yutsak nima qilasiz deganimizda jamoadoshimiz Danil Glebovni ko‘rsatib u bir hafta davomida soqolini olib tashlab, faqat mo‘ylovini qoldirib yuradi degandi. Instagramda Glebovning mo‘ylovli rasmlari tarqaldi (kuladi).

    - Internetda “Shalke-04” va “Manchester Yunayted” klublaridan qiziqish borligi haqida xabarlar chiqdi. Bular qanchalik rost yoki yolg‘onligini bilmaymiz. Tasavvur qiling, oldingizda aynan shu ikki klubdan taklif bo‘lsa, qaysi birini tanlardingiz? Aynan shu ikki klubdan.
    - Agar aynan shu ikki klubdan birini tanlash kerak bo‘lsa, “Shalke-04”ni tanlardim. “Manchester Yunayted” ham yaxshi jamoa, ammo hali o‘zimni katta jamoa darajasiga chiqdim deb hisoblamayman. Bunday jamoaga tayyor holatda o‘tish lozim. Yuqori saviyaga chiqish uchun vaqt talab etiladi. Shunga hozir Bundesligada o‘ynashni afzal ko‘rardim.

    - Siz Rossiyada kvartirada emas klub bazasida yashayotganingizni eshitdik. Adashmasak klub kvartira olib bergandi...
    - Ko‘pincha klub bazasida turaman. “Rostov” kvartira olib bergan, u yerga asosan uydagilar kelishganida boraman. Bazada barcha sharoitlar bor, to‘g‘ri ovqatlanish yo‘lga qo‘yilgan. Kvartirada yashasam o‘zim ovqat tayyorlashimga to‘g‘ri keladi (kuladi).

    - Bir yil davomida O‘zbekiston terma jamoasini boshqarib borgan Ektor Kuper iste’foga chiqarildi va uning o‘rniga Vadim Abramov tayinlandi. Bu o‘zgarishlarga qanday munosabat bildirasiz?
    - Murabbiy taqdiri shunday, natija bo‘lmasa uni almashtirishadi. Har bir murabbiyning o‘z uslubi bo‘ladi. Endi yangi murabbiyning taktikasi va yo‘nalishiga tezroq kirishib natija ko‘rsatishga harakat qilamiz. Maqsadimiz Jahon chempionatiga chiqish ekan endi barcha o‘yinlarda g‘alaba qozonishimiz kerak.

    - Qaysi biriga ko‘proq ishonasiz: “Rostov” Rossiya chempioni bo‘lishi va O‘zbekiston Jahon chempionatiga chiqishi?
    - Ikkalasiga ham. Sababi O‘zbekiston terma jamoasiga 2018 yilgi saralashda bitta gol yetmay qolgandi. Shu bois bu qo‘limizdan keladi deb o‘ylayman. "Rostov" ham chempion bo‘lish uchun yaxshi imkoniyat bor. Bugungi kunda futbolchilarda o‘ziga bo‘lgan ishonch yetarli darajada. Klub oldiga yil boshida Yevropa Ligasiga yo‘llanma olish vazifasi qo‘yilgan, lekin chempionlikka ham kurasha olamiz deb o‘ylayman. Rossiya premer-ligasida 4ta klub bir xil ochko bilan peshqadamlik qilmoqda.

    - “Rostov” bu yil peshqadamlar safida bormoqda. Oldinlari jamoa asosan o‘rta pog‘onalarda borardi, klubda nimadir o‘zgardimi?
    - "Rostov"ga Valeriy Karpin kelganida barcha narsa to‘g‘ri yo‘lga qo‘yilgan va professional tarzda ish olib borilmoqda. Barchasi bir xil tizimda davom etmoqda. Shu bois ham bu yil jamoamiz ishonchli o‘yin ko‘rsatmoqda deb o‘ylayman. O‘tgan mavsumda esa qayerdadir yaxshi o‘ynadik, qayerdadir esa o‘zimizdan kuchsiz jamoalarga esa yutqazib qo‘ygandik. Bu mavsum o‘sha xatolarni takrorlamaslikka harakat qilayapmiz.

    - Karpin doim jiddiy qiyofada yuradi. Kiyim almashtirish xonasida o‘zini qanday tutadi?
    - Karpin jiddiy inson, ammo hazillashib ham turadi. Uning uchun har bir o‘yin xuddi eng oxirgi uchrashuvdek, finaldek. Har bir o‘yinda g‘alaba qozonishni istaydi.

    - Bu yil Shomurodov familiyasi Rossiyada Dzyuba, Smolov kabi hujumchilardek brendga aylandi desak mubolag‘a bo‘lmasa kerak. Matbuot ham sizga ko‘p e’tibor qiladi, muxlislar ham ko‘p dastxat va rasmga tushishni so‘rayotgan bo‘lsa kerak. Shunday paytda Eldor Shomurodovda nimadir o‘zgardimi?
    - To‘g‘risini aytsam, hech narsani o‘zgartirmaslikka harakat qilaman. Ammo Rostovda ko‘chaga chiqsam muxlislar tanib qolishadi, rasmga tushaylik deyishadi. Men uchun biroz noqulay bo‘ladi. O‘zimni hech qachon birovdan ustun qo‘ymaganman. Lekin hech kimga hech qachon yo‘q demaganman, tarbiyam shunday.

    - Eldor Shomurodov terma jamoada va klubda, boshqa-boshqa odamlarmi?
    - Yo‘q, mutlaqo bir xil. To‘g‘ri oldinlari terma jamoada qanotda o‘ynardim, hozir esa termada ham, “Rostov”da ham markaziy hujumda harakat qilayapman.

    - So‘nggi hazil savol. Qaysi birini tanlaysiz: Osh yoki Jarqo‘rg‘on tandir go‘shti?
    - (kuladi) eng qiyin savol bo‘ldi. Menimcha oshni ustiga tandir go‘shtni qo‘yib yeyish.
    Narzulla Saydullayev suhbatlashdi.

    Manba: championat.asia

    Facebook орқали авторизация
    Ma'lumot

    Посетители, находящиеся в группе Гости, не могут оставлять комментарии к данной публикации.
    » » Eldor Shomurodov: “Rostov” chempion bo‘lishiga ham, O‘zbekiston Jahon chempionatiga chiqishiga ham ishonaman”