Piyoda yurish va bog‘dorchilik bilan shug‘ullanish depressiyaga chalinishni 23 foizga kamaytiradi

Angliyaning Raskin universiteti olimlari olib borgan tadqiqot natijalariga ko‘ra, bog‘dorchilik, golf o‘yini va piyoda yurish kabi o‘rtacha qiyinlikdagi jismoniy faollik depressiyaning oldini oladi, deb yozadi Lifehacker.

Universitet mutaxassislari jismoniy faollik va depressiyaga tushish o‘rtasidagi bog‘liqlikni aniqlash uchun to‘rt milliondan ortiq shaxslarning ma’lumotlarini ko‘rib chiqdi. Shuningdek, ular faol hayot tarzi bilan doimiy tashvishlanish o‘rtasidagi umumiy jihatlarni ham aniqladi. Tadqiqotda 65 mingdan ortiq insonlar ishtirok etdi.

^{Foto: Lifehacker}
O‘rganishlar natijasida shizofreniya, psixoz kabi ruhiy kasalliklarning ham jismonan sust insonlarda ko‘proq uchrashi ma’lum bo‘ldi. Shunday qilib, o‘rtacha yengillikdagi jismoniy mashqlar depressiyani 23 foizga, doimiy tashvishlanishni 26 foizga, shizofreniyani esa 27 foizga kamaytiradi. Qizig‘i shundaki, og‘ir va murakkab turdagi sport va mashqlar ko‘p hollarda stressga olib keldi.

"Bundan xulosa qilish mumkinki, har bir insonga individual tarzda jismoniy faoliyat turini tanlash bo‘yicha aniq ko‘rsatma va shifokor tavsiyalari zarur", — deydi tadqiqot mualliflaridan biri Li Smit.

Tadqiqot ishtirokchilari jinsi, yoshi va yashash joyidan qat’i nazar bir xil natija ko‘rsatdi. “Zamin” yangiliklarini “Vkontakti”da kuzatib boring