Россиялик теннисчи Камилла Раҳимова Ўзбекистон теннис терма жамоасига қўшилди. Бу ҳақда Ўзбекистон Теннис федерацияси матбуот хизмати хабар берди.
Федерация вакиллари Раҳимованинг қўшилиши аёллар терма жамоасини янада кучайтиришини таъкидлади. Декабр ойининг бошига келиб спортчи WTA рейтингида 109-ўринни эгаллаб турибди.
Россия Теннис федерацияси раҳбари Шамил Тарпищев Раҳимованинг Ўзбекистон терма жамоасига ўтишини хиёнат деб ҳисобламаслигини айтди. Унга кўра, Камилла Раҳимованинг спорт фуқаролигини алмаштириш қарори шунчаки ўйин амалиётини давом эттириш истаги билан боғлиқ.
“Бизнинг терма жамоамизга у кира олмасди. Ўзбекистон сафида эса имконият бор.
Аммо бу ҳали Олимпиада йўлланмасини қўлга киритишни англатмайди. Олимпиадага йўл олиш учун WTA рейтингида камида 60-70-ўринларда бўлиш керак”, — дейди Тарпищев ТАСС агентлигига берган интервьюсида.
Камилла Раҳимова 2001-йил 28-август куни Екатеринбург шаҳрида туғилган. 24 ёшли теннисчи жуфтлик беллашувларида учта WTA турнири чемпионлигини қўлга киритган.
Унинг яккаликдаги энг яхши рейтинги 60-ўринни ташкил этган. Бу ҳақда Ўзбекистон Теннис федерацияси маълум қилди.
Ubitennis портали хабарича, Раҳимова Франциянинг Анже шаҳрида ўтказилаётган WTA 125 турнирида иштирок этмоқда. У турнирнинг илк босқичида россиялик Алина Корнеевани 6:1, 6:1 ҳисобида мағлуб этган.
Раҳимова Ўзбекистон шарафини ҳимоя қилаётган ва WTA рейтингида илк 200 таликка кирган икки теннисчидан бири ҳисобланади.
Меҳмон гуруҳидаги фойдаланувчилар ушбу мақолага изоҳ қолдира олмайди.
