Туркия чемпионатининг янги мавсумига муҳр босган қаҳрамонлар орасида Элдор Шомуродов алоҳида тилга олинади. Ёзда “Рома”дан “Истанбул Башакшеҳир”га йўл олган 30 ёшли ҳужумчи Суперлиганинг биринчи даврасидаёқ ўзининг қанчалик катта иштиёқ ва масъулият билан келганини исботлади. 17 та ўйин — 12 та гол! Бу кўрсаткич уни тўпурарлар пойгасида пешқадамга айлантириб турибди.
Иккинчи давра олдидан Anadolu ахборот агентлиги ўзбекистонлик форварддан катта интервью олди. Шомуродов суҳбатда мавсумнинг оғир бошланиши, “Башакшеҳир”даги янги муҳит, Нури Шаҳиннинг таъсири, ички рақобат, Жаҳон чемпионатига тайёргарлик ва ҳатто Ўзбекистон ҳақида ҳам самимий фикрларини баён қилди.
Мавсумнинг илк ярми: қийинчиликдан ишончгача
Элдорнинг айтишича, биринчи яримда жамоа айрим синовларга дуч келган. Спорт формаси ҳам ҳар доим ҳам идеал бўлмаган, мавсум аввалида кутилган натижаларга етиб борилмаган. Бироқ жамоа бу ҳолатни тан олган ҳолда, тўхтаб қолмади — аксинча, “камчиликларни тўғрилаш” учун бор имкониятни ишга солган.
Энг муҳими, ҳали ҳам Европа кубокларига чиқиш имконияти сақланиб турибди. “Башакшеҳир”нинг асосий мақсади — Европа мусобақалари учун йўлланмани қўлга киритиш. Шомуродов шу йўлда қаттиқ меҳнат қилинаётганини, иккинчи даврани анча юқори суръатда ўтказишга ишонишини таъкидлади.
“Рома”дан кетиш сабаби: кўпроқ ўйнаш ва ўзини топиш
Шомуродов “Башакшеҳир”ни танлаган асосий сабабни очиқ айтди: у кўпроқ майдонга тушишни истаган. Мураббийлар штаби, иш услуби ва жамоанинг ўйин фалсафаси унда яхши таассурот қолдирган. Ҳозир у бутун диққат-эътиборини фақат “Башакшеҳир”га қаратганини айтади.
“Бошқа жамоалар ҳақида ўйлаб ҳам кўрмадим”, дейди Элдор. Келажакни фақат Аллоҳ билади, аммо ҳозир у Истанбул муҳитига ҳам, жамоага ҳам кўниккан. Унинг фикрича, инсон ҳалол меҳнат қилса ва тўғри йўлдан юрса, Аллоҳ албатта меҳнатини зое қилмайди.
Нури Шаҳин таъсири: бир кундаёқ ўзгариш бошланган
Шомуродовнинг таъкидлашича, Нури Шаҳин жамоага келган биринчи кунданоқ кўп нарсани ўзгартирган. Унинг футболчилар руҳиятини тушуна олиши, ҳар бир ўйинчининг ҳис-туйғусини ҳис қилиши жамоа учун катта плюс.
“Нури Шаҳин билан жамоа анча яхшиланди”, дея ишонч билан қўшимча қилади Элдор. Унинг назарида, ҳозир “Башакшеҳир” тўғри йўлдан кетяпти.
Ички рақобат: позиция муҳим эмас, фойда муҳим
“Башакшеҳир”да кучли форвардлар кўп. Демак, рақобат ҳам қаттиқ. Шу сабаб баъзан Элдор турли позицияларда ҳаракат қилишга мажбур бўляпти. У “тўққизлик”да ўйнашни албатта ёқтиришини яширмайди, аммо “ўнлик”да ҳам майдонга тушиб жамоага фойда келтира олса, унинг учун шу ҳам етарли.
Бу гапнинг тагида оддий ҳақиқат бор: гол урса ҳам, ассист берса ҳам, позиция алмашса ҳам — мақсад битта, жамоани ютишига хизмат қилиш.
Жаҳон чемпионати: “фақат қатнашиш учун эмас”
Шомуродов суҳбатда Ўзбекистон учун тарихий воқеага алоҳида тўхталди: терма жамоа илк бор Жаҳон чемпионатининг финал босқичига йўл олди. Элдор буни бутун халқ учун катта қувонч, деб баҳолайди ва тайёргарлик жиддий кетяпти, дея қайд этади.
“Энг муҳими — майдонда мамлакатимизга муносиб ўйнаш”, дейди у. У гуруҳдан чиқиш имконияти ҳар доим борлигини, Ўзбекистон фақат иштирок этиш билан чекланиб қолмаслигини, яхши натижа учун ҳам курашишини таъкидлади.
БААга қарши тарихий ўйин: кўз олдидан “бутун йўл” ўтган
Бирлашган Араб Амирликларига қарши ўтган ҳал қилувчи учрашувни Элдор “энг унутилмас” деб атади. Айнан шу беллашув орқали у Жаҳон чемпионатида иштирок этиш имкониятига эга бўлганини айтади. У пайтда гўё бутун футболчилик фаолияти кўз олдидан ўтиб кетгандек ҳис қилган.
Бундай лаҳзалар футболчини футболчи қилади: бир ўйин — бутун умрга тенг.
Туркия термаси ҳақида: ишонч баланд
Шомуродов Туркия миллий жамоасини ҳам юқори баҳолади. Унинг фикрича, Туркия термаси жуда кучли ва албатта Жаҳон чемпионатига чиқади. Агар ўз имкониятларини тўлиқ кўрсата олса, финал босқичида ҳам яхши натижа қилишларига ишонади.
Ўзбекистон — фахр ва соғинч манзили
Интервюнинг энг илиқ нуқталаридан бири — Шомуродовнинг Ўзбекистон ҳақидаги гаплари бўлди. У ўзбек таомлари турк ошхонасидан қолишмаслигини, Самарқанд, Хива, Бухоро каби тарихий шаҳарларимизнинг бетакрор эканини айтди. Тошкентнинг ҳам анча ўзгаргани, янги гўзал масканлар пайдо бўлганини таъкидлаб, Ўзбекистонда кўришга арзийдиган жойлар жуда кўплигини қўшимча қилди.
Файзуллаев ва Зеки Челик: ҳурмат ва дўстлик сақланяпти
Элдор Аббосбек Файзуллаевни Ўзбекистоннинг ёш истеъдодларидан бири деб атади. Бошида унга осон бўлмаган, лекин ҳозир ўйини сезиларли тарзда ўсган. Агар шу формани ушлаб қолса, ажойиб натижаларга етиши мумкинлигини билдирди.
“Рома”да бирга ўйнаган Зеки Челик билан ҳам алоқалар узилмаган. Вақти-вақти билан кўришиб туришади, муносабат яхши. Шунингдек, “Башакшеҳир”да Зекининг яқин дўстларидан бири Муҳаммад Шенгезер борлиги ҳам бу алоқаларни узлуксиз сақлаб туришга сабаб бўлаётгани айтилди.
Иккинчи давра қачон старт олади?
“Истанбул Башакшеҳир” Суперлиганинг иккинчи даврасини 17 январ куни бошлайди. 18-турнинг очилиш баҳсида Элдор Шомуродов жамоаси ўз уйида “Фотиҳ Карагюмрюк”ни қабул қилади.
Биринчи даврада 12 гол урган форварддан энди мухлислар яна бир нарсани кутяпти: голлар давоми ва Европа йўлланмаси учун ҳал қилувчи қадамлар. Элдорнинг ўзи эса буни яширмаяпти — мақсад катта, ишонч ҳам катта.
“Zamin”ни Telegram'да ўқинг!
