Тошкент шаҳрида жанговар ўқ-дориларни пуллаб юбормоқчи бўлган шахс қўлга олинди. Бу ҳақда Ички ишлар вазирлиги расмий маълумот берди.
Маълум қилинишича, Чилонзор туманида ўтказилган тезкор тадбирлар давомида 2001 йилда туғилган фуқаро харидорга 1 300 АҚШ доллари эвазига 22 дона, калибри 5,45 миллиметр бўлган жанговар ўқларни сотиш пайтида ушланган. Ашёвий далиллар белгиланган тартибда расмийлаштириб олинган.
Текширувлар давомида ушланган шахс муқаддам Сурхондарё вилоятидаги ҳарбий қисмда портлатувчи-ҳайдовчи сифатида фаолият юритгани аниқланган. Шунингдек, у мазкур ўқ-дориларни аввал бирга ишлаган ҳарбий ходимдан 10 миллион сўмга сотиб олгани айтилмоқда.
Ҳолат юзасидан гумонланувчига нисбатан Жиноят кодексининг тегишли моддалари асосида иш қўзғатилиб, ҳозирда суриштирув ва тергов ҳаракатлари олиб борилмоқда.
Эслатиб ўтамиз, аввалроқ турли ҳудудларда портловчи модда ва қурол-аслаҳага оид шубҳали ҳолатлар ҳам қайд этилгани ҳақида хабарлар тарқалган эди.
“Zamin”ни Telegram'да ўқинг!
