INEOS ва сэр Жим Рэтклифф “Манчестер Юнайтед”нинг спорт йўналишидаги бошқарувини қўлига олганига қарамай, клубнинг асосий акция пакети ҳали-ҳамон Жоэл ва Аврам Глейзерлар назоратида қолмоқда. Шу сабаб, клуб атрофидаги ҳар қандай ҳаракат мухлислар эътиборини тортади — айниқса, дерби арафасида.
Одатда омма олдида деярли кўринмайдиган клуб ҳаммуассислари айнан Майкл Кэррикнинг дебюти олдидан Манчестерга келиши ҳақида хабарлар тарқалди. “TalkSPORT” маълумотига кўра, 2005 йилда “Манчестер Юнайтед”ни сотиб олган Малком Глейзернинг ўғиллари “Манчестер Сити”га қарши баҳсдан олдин шаҳарга етиб келган.
Манбада таъкидланишича, бу ташриф тасодиф эмас. Глейзерларнинг Манчестерга келиши Рэтклифф ва унинг жамоаси дуч келаётган ташкилий муаммолар, клуб ичидаги йўл харитаси ва келажак стратегияси билан бевосита боғлиқ бўлиши мумкин.
Хабарларга кўра, улар махсус учрашувда иштирок этади. У ерда янги бош мураббий билан яқиндан суҳбат ўтказилиши, шунингдек, Рэтклифф томонидан йўлга қўйилаётган бошқарув модели ва клубнинг узоқ муддатли режалари муҳокама қилиниши кутилмоқда. Қисқаси, гап оддий “кўриб кетиш” эмас — гап катта қарорлар ҳавосида.
Албатта, бундай йиғилишлар жорий мавсумда “қизил иблислар” тақдирига қандай таъсир қилиши ҳозирча номаълум. Бироқ дерби олдидан юқори даражадаги бундай ҳаракатлар клуб ичида нимадир жиддий тарзда қайта кўриб чиқилаётганидан дарак бериши мумкин.
Эслатиб ўтамиз, Манчестер дербиси эртага соат 17:30 да старт олади. Мухлислар эса майдондаги натижадан ташқари, клуб ичида қабул қилинадиган қарорлар ҳам “Юнайтед” келажагини қайси томонга буришини диққат билан кузатади.
“Zamin”ни Telegram'да ўқинг!
