Германия терма жамоасининг собиқ ҳужумчиси Мирослав Клозе Жаҳон чемпионатларидаги голлари бўйича рекорди яқин йилларда янгиланиши мумкинлигини таъкидлади. Бу ҳақда euro-football.ru хабар беради.
Клозе тўртта мундиалда иштирок этиб, умумий ҳисобда 16 бор рақиб дарвозасини ишғол қилган. Ҳозирда амалдаги футболчилар орасида унга энг яқин кўрсаткичлар Лионел Мессида (13 гол) ва Килиан Мбаппеда (12 гол).
“Ишончим комил, Жаҳон чемпионатида урилган голлар бўйича рекордим тез орада янгиланади. Буни 2026 йилда Месси амалга ошириши мумкин, Мбаппе эса 2026 ёки 2030 йилда бунга яқин турибди. Мен Леонинг катта мухлисиман ва у фаолиятини давом эттирса, унга фақат энг яхшисини тилайман. Мбаппенинг ҳам истеъдоди ниҳоятда кучли. Иккаласи ҳам соғлом бўлиб, имкониятининг энг юқори даражасини кўрсатишини истайман. Шунга қарамай, ҳозирча энг яхши статистика мендан ва мен ярим финалда тўрт марта ўйнаган ягона футболчиман”, — дея Клозе сўзларини Bild нашри келтирди.
Месси 2022 йилги Қатар мундиалида чемпион бўлган, Мбаппе 2018 йилда Россияда кубокни қўлга киритган. Клозе эса Германия билан 2014 йил Бразилия мундиалида зафар қучган.
“Zamin”ни Telegram'да ўқинг!
