Наманган вилоятида ҳуқуқни муҳофаза қилувчи органлар томонидан ўтказилган навбатдаги тезкор тадбирда яна бир жиноий схемага чек қўйилди. Давлат хавфсизлик хизмати вилоят бошқармаси ходимлари Бош прокуратура ҳузуридаги Департамент ҳамда Божхона идоралари билан ҳамкорликда Чуст тумани ҳудудида махсус операция ўтказди.
Олиб борилган тадбир давомида маълум бўлишича, Янги Наманган туманида яшовчи шахс ҳамда Чуст туманида истиқомат қилувчи, муқаддам судланган фуқаро олдиндан келишиб олган ҳолда ноқонуний фаолият билан шуғулланган. Улар хориждан олиб келинган қалбаки валюта — 10 минг АҚШ долларини ҳақиқий пул сифатида муомалага киритишни режалаштирган.
Жиноий режага кўра, мазкур қалбаки долларлар шартли харидорга 7,5 минг АҚШ доллари эвазига сотилиши керак бўлган. Бироқ келишилган пайтда тезкор идоралар томонидан улар ушбу ноқонуний битимни амалга ошираётган вақтда ашёвий далиллар билан қўлга олинди.
Маълумотларга кўра, ушбу ҳолат юзасидан тегишли тартибда жиноят иши қўзғатилган. Айни дамда ҳуқуқни муҳофаза қилувчи органлар томонидан суриштирув ва тергов ҳаракатлари изчил олиб борилмоқда.
Бу каби ҳолатлар яна бир бор шундан далолат берадики, ноқонуний валюта айланмаси ва қалбаки пуллар билан боғлиқ жиноятларга қарши кураш изчил давом этмоқда. Мутахассислар эса фуқароларни ҳар қандай молиявий операцияларда ҳушёр бўлишга, шубҳали таклифларга ишонмасликка чақиради.
Қонун устуворлиги таъминланаётган бугунги кунда бундай жиноятларга қарши қатъий чоралар кўрилиши табиий.
“Zamin”ни Telegram'да ўқинг!
