Германия терма жамоасининг собиқ ҳужумчиси Мирослав Клозе жаҳон чемпионатлари тарихидаги тўплар бўйича ўз рекорди тез орада янгиланишига ишонмоқда. Бу ҳақда euro-football.ru хабар беради.
Клозе тўртта мундиалда иштирок этиб, жами 16 марта рақиб дарвозасини ишғол қилган. Ҳозир фаол футболчилар орасида унга энг яқин кўрсаткич Лионел Мессида — 13 гол, Килиан Мбаппеда эса — 12 гол.
«Рекордим албатта йиқилади. Буни 2026 йилда Месси амалга ошириши мумкин, Мбаппе эса 2026 ёки 2030 йилларда яқинлашади. Мен Леонинг ашаддий мухлисиман ва у ўйнашда давом этса, энг яхши тилакларимни билдираман. Мбаппенинг истеъдоди ҳам ақлбовар қилмас даражада. Иккаласи ҳам соғлом бўлиб, максимал даражасини кўрсатишини истайман. Шунга қарамай, ҳозирча энг яхши статистика мендаги ва ярим финалда тўрт марта ўйнаган ягона футболчиман», — дея Клозенинг сўзларини Bild келтирди.
Эслатиб ўтамиз, Месси 2022 йил Қатар мундиалида чемпион бўлган, Мбаппе 2018 йилда Россияда кубокни қўлга киритган, Клозе эса 2014 йил Бразилиядаги турнирда ғолибликни нишонлаган.
“Zamin”ни Telegram'да ўқинг!
