28-noyabrdan 5-dekabrgacha Respublika fond birjasi «Toshkent»da taqdim etilgan yuqori likvidli aksiyalarning aksariyati ijobiy dinamikani ko‘rsatdi, biroq fond indeksi UCI 3,31 foizga pasaydi. Ushbu davrda Hamkorbank aksiyalari eng katta o‘sishni qayd etib, 12,56 foizga qimmatlashdi.
Shuningdek, UzRTSB (+8,80 %) hamda Trastbank (+6,47 %) aksiyalarida ham o‘sish kuzatildi. Aksincha, Garant bank aksiyalari 15,62 foizga arzonlab, haftaning eng katta yo‘qotuvchisi bo‘ldi.
Shuningdek, «O‘zmetkombinat» (-6,25 %) va UzAuto Motors (-5,56 %) oddiy aksiyalarida ham tushish qayd etildi. Ipoteka-bank va Aloqabank aksiyalari esa narxini o‘zgartirmadi.
Ushbu davrda bitimlar soni bo‘yicha UzRTSB (544 bitim), Kapital sug‘urta (481) va Hamkorbank (433) yetakchilik qildi. Aksiyalar bozoridagi savdo hajmi bo‘yicha Hamkorbank birinchi o‘rinni egallab, 14,67 milliard so‘mlik savdo amalga oshirdi.
Elektrqishloqqurilish (269,93 million so‘m) va UzRTSB (176,89 million so‘m) ham yetakchilar qatoridan joy oldi. Yuqori likvidli aksiyalardan 18 tasi hafta davomida o‘sdi, ikki aksiya narxini o‘zgartirmadi, to‘qqiztasi esa pasaydi.
Birjaning asosiy maydonchasidagi umumiy savdo hajmi 217,74 milliard so‘mni tashkil etdi. Bir hafta avval esa Respublika fond birjasi «Toshkent»da fond indeksi UCI 3,22 foizga oshgani haqida xabar berilgan edi.
O‘sha davrda «Qashqadaryo texnologik transport» aksiyalari eng yuqori o‘sishni qayd etib, 9,86 foizga qimmatlashgan edi. Shuningdek, «O‘zmetkombinat» (+6,67 %) va Hamkorbank (+6,37 %) aksiyalarida ham o‘sish kuzatilgan edi.
Mehmon guruhidagi foydalanuvchilar ushbu nashrga izoh qoldira olmaydi.
