Milliy statistika qo‘mitasi keltirgan ma’lumotlarga ko‘ra, 2026 yil 1 yanvar holatiga O‘zbekistonda BAA kapitali ishtirokida jami 414 ta korxona ishlab turibdi. E’tiborli tomoni — ularning asosiy qismi an’anaviy tarzda Toshkent shahri hissasiga to‘g‘ri keladi.
Raqamlar tarkibi ham qiziq: 414 ta korxonaning 141 tasi qo‘shma korxona (mahalliy va xorijiy hamkorlikda), 273 tasi esa to‘liq xorijiy korxona hisoblanadi. Bu, oddiy qilib aytganda, ikki davlat o‘rtasidagi investitsion hamkorlik “gapda emas, amalda” ketyapti degani.
Hududlar kesimida taqsimot quyidagicha:
- Toshkent shahri — 304 ta
- Toshkent viloyati — 32 ta
- Samarqand viloyati — 16 ta
- Sirdaryo viloyati — 11 ta
- Qoraqalpog‘iston Respublikasi — 8 ta
- Andijon viloyati — 8 ta
- Buxoro viloyati — 7 ta
- Jizzax viloyati — 6 ta
- Namangan viloyati — 6 ta
- Navoiy viloyati — 5 ta
- Qashqadaryo viloyati — 4 ta
- Farg‘ona viloyati — 4 ta
- Xorazm viloyati — 2 ta
- Surxondaryo viloyati — 1 ta
Tahlilga ko‘ra, bu korxonalarning qariyb 73 foizi Toshkent shahri hissasiga to‘g‘ri kelyapti. Bu holatni “poytaxtda pul aylanadi” debgina tushuntirish kamlik qiladi: logistika, kadrlar bozori, bank-moliya infratuzilmasi, xizmatlar sifati va biznes uchun qulay muhit — hammasi bir joyda jamlangan.
Qaysi yo‘nalishlar “top”da?
BAA investorlari ishtirokidagi korxonalar asosan qurilish, ko‘chmas mulk, savdo, energetika, sanoat, xizmat ko‘rsatish hamda logistika kabi sohalarda faoliyat yuritmoqda. Ya’ni pul faqat “devor”ga emas, aylanma iqtisodga ham kiryapti.
Eng muhim xulosa: statistikadagi bu raqamlar hozirgi holatni ko‘rsatadi, lekin trend kelajakni aytayapti — hamkorlik kengayadi, yangi loyihalar ko‘payadi. Faqat bitta narsa aniq: hududlar ham bu “investitsiya xaritasi”da ko‘proq ulush olishi uchun infratuzilma va qulay shart-sharoit bo‘yicha raqobatni kuchaytirishi kerak.
“Zamin”ni Telegramʻda oʻqing!
