“Manchester Siti” rasmiy sayti yana bir yoqimli an’anani ishga tushirdi: butun dunyoga sochilib ketgan muxlislar ovozi orqali yanvar oyining eng yaxshi o‘yinchisi tanlanadi. Bu shunchaki “kimni yaxshi ko‘rasiz?” degan so‘rov emas — klub har bir nomzodning oy davomidagi haqiqiy hissasini ham ochiqlab, tanlovni mazmunli qilayapti.
2026-yilning birinchi oyi “Siti” uchun juda zich o‘tdi: to‘rtta turnir, to‘qqizta o‘yin, turli bosim, turli ssenariy. Mana shu jadvalda uch futbolchi alohida ko‘zga tashlandi: Abduqodir Husanov, Bernardu Silva va Janluiji Donnarumma. Ulardan biri — himoyani tikladi, biri — o‘yinni boshqardi, yana biri — darvozani “qulfladi”. Endi esa muxlislar hal qiladi.
Abduqodir Husanov
“Lans”dan “Manchester Siti”ga ko‘chib kelganidan keyin bir yil o‘tib, o‘zbekistonlik himoyachi “Etixad”dagi faoliyatidagi eng yorqin oylardan birini o‘tkazdi. Gvardiola jamoasining himoya chizig‘i asosiy futbolchilar jarohatlari sabab ancha “silkinib” qolgan paytda, aynan Husanov maydonga tushirildi. Va kutilganidan ham ziyoda natija ko‘rsatdi.
“Chelsi”ga qarshi 1:1 bilan tugagan bahsning ikkinchi bo‘limida zaxiradan tushgan 21 yoshli futbolchi keyingi o‘yinlarda markaziy himoyada doimiy startga aylandi. Uning tezligi, jismoniy kuchi va texnik tayyorgarligi uyg‘unlashgan individual harakatlari murabbiylar ishonchini ham, muxlislarning hurmatini ham qozondi.
Husanov uchun yanvar oyining boshi va oxiri, ayniqsa, esda qolarli bo‘ldi. Oy boshida “Brayton”ga qarshi bahsda u markaziy himoyada debyutant Maks Alleyn bilan juftlikda o‘ta xavfli hujumga ega raqibga qarshi ishonchli o‘yin namoyish qildi. Oy oxirida esa Yevropa Chempionlar ligasida “Galatasaroy”ga qarshi so‘nggi turda turkiyaliklar hujumlarini bartaraf etish, ayniqsa Viktor Osimxenni to‘xtatishda katta yordam berdi. “Etixad”dagi 2:0 g‘alaba jamoani 1/16 finalga olib chiqdi — va bu yerda Husanovning hissasi juda sezildi.
Bernardu Silva
Bu mavsum sardorlik bog‘ichini taqqan portugaliyalik yarimhimoyachi yana “Siti”ning asosiy “motor”laridan biriga aylandi. Texnika, mehnatsevarlik va g‘alabaga chanqoqlik — Bernarduning klassik “komplekti”. Zich taqvimda u nafaqat barqaror, balki ilhomli o‘yinlari bilan ham ajralib turdi.
U jamoa manfaatini birinchi o‘ringa qo‘yadigan haqiqiy jamoaviy futbolchi sifatida yana ko‘pchilikka namuna bo‘ldi. Yanvardagi eng yorqin kechalardan biri “Sent-Jeyms Park”dagi safar o‘yini bo‘lib, u yerda Bernardu Liga kubogi yarim finalining birinchi bahsida “Nyukasl” ustidan 2:0 hisobida juda muhim ustunlikni ta’minlashda katta rol o‘ynadi.
Yana bir muhim jihat: Bernardu ijodkorlikni ham ko‘rsatdi. Avval Liga kubogida “Nyukasl”ga qarshi, keyin chempionatda “Vulverxempton” ustidan 2:0 hisobidagi g‘alabada u yangi hujumchi Antuan Semenoga ikki ajoyib golli pas uzatdi. Qisqasi, Bernardu bu oyda ham “o‘yinni ulaydigan” futbolchi bo‘lib qoldi.
Janluiji Donnarumma
Italiyalik darvozabon yanvar oyida yana bir bor nega dunyodagi eng kuchli posbonlardan biri sanalishini isbotladi. Sokin, muvozanatli va ishonchli Donnarumma himoyada qo‘shimcha barqarorlik berdi — ya’ni himoyachilarning xatosi ham “qayta tiklanadigan” darajaga tushdi.
Oy boshida “Etixad”da “Brayton”ga qarshi 1:1 durangda u bir nechta jon saqlovchi seyvlar bilan jamoani o‘yinda ushlab qoldi. “Manchester Yunayted”ga qarshi derbida 0:2 mag‘lubiyat qayd etilgan bo‘lsa ham, Donnarummaning o‘yini yomon bo‘lmadi — ba’zi vaziyatlarda hisob yanada og‘irlashmasligiga aynan u sababchi bo‘ldi.
Yanvar esa eng yaxshi tarzda yakunlandi: ketma-ket ikki “quruq” o‘yin. Premer-ligada “Vulverxempton”ga qarshi va Yevropa Chempionlar ligasida “Galatasaroy”ga qarshi bahslarda Donnarumma darvozasini daxlsiz saqlab qoldi. Har ikki o‘yin ham 2:0 hisobida “Siti” foydasiga hal bo‘ldi — va bu yerda darvozabonning hissasi juda katta.
Endi esa gap muxlislarda
Uch nomzod — uchta turli kuch: biri himoyada “soqchi”, biri markazda “dirijyor”, biri darvozada “qalqon”. Qay biri yanvar qahramoni nomiga ko‘proq munosib? So‘nggi qaror — ovoz berishda.
Ushbu link orqali o‘zbekistonlik futbolchiga ovoz berishingiz mumkin.
“Zamin”ni Telegramʻda oʻqing!
