Angliya premer-ligasining 24-turidagi eng qattiq va murosasiz bellashuvlardan biri aynan Londonda bo‘lib o‘tdi. Chempionlik poygasida har bir ochko zarba qiymatida turgan pallada “Tottenxem” o‘z maydonida “Manchester Siti”ni qabul qildi va ikki to‘p farqida ortda qolganiga qaramay, mag‘lubiyatdan qutulib qoldi.
Uchrashuvning birinchi qismida Gvardiola shogirdlari vaziyatni to‘liq nazoratga oldi. Rayan Sherki va Antuan Semeno ketma-ket gol urib, mehmonlarni 2:0 hisobida oldinga olib chiqdi. Ayniqsa, “Siti”ning tezkor o‘tishlari va hujumni bir pasda ochib ketish uslubi birinchi bo‘limda “Tottenxem” himoyasini ancha qiynab qo‘ydi.
Biroq ikkinchi bo‘lim butunlay boshqa sahnaga aylandi. Mezbonlar bosimni keskin oshirdi, hujumlar seriyasi boshlandi va Dominik Solanke dubl qayd etib, hisobni 2:2 qilib tenglashtirdi. Qolgan daqiqalarda ham o‘yin yuqori tempda davom etdi, ammo tabloda raqamlar o‘zgarmadi — tomonlar bittadan ochkoni bo‘lishib oldi.
“Siti” futbolchilariga berilgan baholar
Ushbu o‘yindan so‘ng nufuzli manba — esteemedkompany.com portali “Manchester Siti” o‘yinchilarining harakatlarini baholab chiqdi. Quyida eng asosiy epizodlar bilan birga berilgan reytinglar:
Janluiji Donnarumma — 8/10
Italiyalik posbon ikkinchi bo‘limdagi to‘xtovsiz bosim paytida jamoani bir necha bor qutqarib qoldi. Ketma-ket seyvlar — “Siti”ning durangga ham bo‘lsa “teshik qayiq” emas, butun qayiq bo‘lib yetib kelishida hal qiluvchi omil bo‘ldi.
Mateush Nunesh — 6/10
Himoyada ham, to‘p bilan ishlashda ham u kutilgan darajada barqaror ko‘rina olmadi. Ayrim epizodlarda qaror qabul qilishda kechikishlar sezildi.
Abduqodir Husanov — 6/10
Hamyurtimiz uchrashuv boshida muhim to‘siqlar qo‘ydi, bir necha vaziyatda raqib hujumchilarini “o‘chirib” qo‘ydi. Biroq o‘ylanmasdan qilingan qo‘pol harakat sariq kartochkaga sabab bo‘ldi va shundan keyin Husanovning o‘yinidagi ishonch bir oz pasaygani ko‘zga tashlandi.
Mark Gexi — 6,5/10
To‘p bilan ishlashda madaniyatli harakat qildi, biroq Solankening xavfli chiqishlarini to‘liq neytrallashtira olmadi.
Rayan Ayt-Nuri — 6/10
Jon-jahdi bilan harakat qildi, ammo ba’zi vaziyatlarda o‘yin markazidan chetda qolib ketdi — ta’siri kamroq bo‘ldi.
Niko O’Rayli — 6,5/10
Birinchi bo‘limda yarim himoyada yaxshi ishladi. Keyin pozitsiya o‘zgarishi tufayli chap himoyaga o‘tgach, hujumga ta’siri avvalgidek bo‘lmadi.
Rodri — 6,5/10
Birinchi bo‘limdagi nazorat va taqsimot — yuqori daraja. Ikkinchi bo‘limda charchoq ta’sir qildi, o‘yin keskinlashgan paytda ehtiyotkorlik uchun almashtirildi.
Bernardu Silva — 7/10
Jamoa sardori yana odatdagidek ishchi motor bo‘ldi. Biroq o‘yin oxiriga borib kuch ancha sarflangani sezildi va u ham almashtirildi.
Rayan Sherki — 7,5/10
Gol urdi, harakatlanishi va pozitsiya tanlashi bilan ham jamoaga foydali ish qildi. Uning faolligi “Siti”ga birinchi bo‘limda katta ustunlik bergan omillardan biri bo‘ldi.
Antuan Semeno — 7,5/10
Gol bilan birga o‘yinda eng yorqin ko‘ringan futbolchilardan bo‘ldi. Qanotdagi tezligi va keskin harakatlari xavf yaratdi.
Erling Xoland — 6,5/10
Sherkiga golli uzatma berdi, lekin hisobni 2:0 dan ham qulayroq qilish imkoniyatini ishonchi kam zarba bilan boy berdi. Ikkinchi bo‘limda esa o‘yinga ta’siri pasaydi.
Zaxiradan tushganlar:
Niko — 6/10 — yarim himoyada mehnat qildi, ammo ko‘pchilik fikricha, bosim kuchaygan paytda u ertaroq qo‘shilganida foydasi kattaroq bo‘lardi.
Tijjani Reynders — 6/10 — harakatchanlik bor, ikki marta bosh bilan gol urish imkoniyati ham paydo bo‘ldi, lekin aniqlik yetishmadi.
Jadval, farq va oldindagi katta o‘yin
Bu durangdan keyin “Manchester Siti” ochkolarini 47 taga yetkazib, musobaqa jadvalida ikkinchi o‘rinda qolmoqda. “Arsenal” bu turda g‘alaba qozongani sabab, peshqadam bilan oradaggi farq 6 ochkoga chiqdi.
Endi “shaharliklar”ni yana bir juda og‘ir sinov kutyapti: 8-fevral kuni safarda amaldagi chempion — “Liverpul”ga qarshi bahs. Agar “Siti” chempionlik orzusini haqiqatga aylantirmoqchi bo‘lsa, ana shu uchrashuvda “hisob-kitob” aniq, xatolar esa minimum bo‘lishi shart.
“Zamin”ni Telegramʻda oʻqing!
