O‘zgidromet 31-yanvar hamda 1–3-fevral kunlari respublikada kutilgan yog‘ingarchilik va havo haroratidagi keskin o‘zgarishlar sababli tog‘li hududlarda qor ko‘chishi xavfi borligini ma’lum qildi.
Ogohlantirishga ko‘ra, ayniqsa tog‘ oldi va tog‘li yo‘llarda harakatlanishda ehtiyot choralarini kuchaytirish zarur. Chunki bunday ob-havo sharoitida yo‘llar sirpanchiq bo‘lishi, ko‘rinuv pasayishi va ayrim joylarda xavf kuchayishi mumkin.
Qor ko‘chishi xavfi e’lon qilingan hududlar quyidagilar:
- Qashqadaryo viloyati: Dehqonobod, Kitob, Qamashi, Shahrisabz tumanlari.
- Surxondaryo viloyati: Boysun, Qumqo‘rg‘on, Sariosiyo, Uzun tumanlari.
- Samarqand viloyati: Nurobod, Qo‘shrabot, Samarqand, Urgut tumanlari.
- Jizzax viloyati: Baxmal, Zomin tumanlari.
- Toshkent viloyati: Bo‘stonliq, Parkent, Ohangaron tumanlari (Chotqol tizmasi tog‘lari).
- Namangan viloyati: Pop tumani.
Mutaxassislar tog‘li hududlarda yashovchi aholi, dam olish uchun yo‘lga chiqqanlar va ayniqsa tog‘ yo‘llaridan o‘tuvchi haydovchilardan sergak bo‘lishni so‘ramoqda. Agar zarurat bo‘lmasa, xavf yuqori bo‘lgan yo‘nalishlarda safarni kechiktirish, yo‘lga chiqqanda esa masofa saqlash, tezlikni oshirmaslik va rasmiy ogohlantirishlarga amal qilish tavsiya etiladi.
“Zamin”ni Telegramʻda oʻqing!
