O‘zbekiston kelgusi besh yil ichida turizm xizmatlari eksportini 20 milliard dollarga yetkazishni rejalashtirmoqda. Bu haqda prezident Shavkat Mirziyoyev parlament va xalqiga murojaatida ma’lum qildi.
Samarqandda zamonaviy piyodalar yo‘laklari va ko‘priklar qurilib, Bibixonim, Registon, Amir Temur maqbarasi, Ulug‘bek rasadxonasi, Shohi-Zinda va Afrosiyob muzeyini yagona turistik makonga birlashtirish ko‘zda tutilgan. Bundan tashqari, Shahrisabzda yirik "Gelon" turizm majmuasining birinchi bosqichi ishga tushiriladi, Pop tumanida esa "Arashan" tog‘ kurort-turizm zonasi tashkil etiladi.
Ichon-qal’a immersiv "aqlli" muzey-shaharga aylantiriladi. Shuningdek, Xorazm va Qoraqalpog‘istonda arxeologik yodgorliklar atrofida yirik turistik halqa tashkil etilib, bu hududlarning jozibadorligini oshirish va xorijiy mehmonlarning bu yerda qolish muddatini uzaytirishga xizmat qilishi kutilmoqda.
Ushbu xizmatlar sohasidagi talabni rag‘batlantirish uchun 85 trillion so‘m kredit mablag‘lari va 9 trillion so‘m subsidiya ajratilishi rejalashtirilgan. Bundan tashqari, ta’lim xizmatlarini qo‘llab-quvvatlash uchun budjetdan 7 trillion so‘m ajratiladi.
Mehmon guruhidagi foydalanuvchilar ushbu nashrga izoh qoldira olmaydi.
