TasteAtlas tomonidan e’lon qilingan dunyoning 100 ta eng yaxshi oshxonasi reytingi yana muhokamalarga sabab bo‘ldi. Afsuski, ushbu gal ham O‘zbekiston milliy oshxonasi nufuzli ro‘yxatdan joy ololmadi. Reyting qariyb 19 ming xil taom va yarim milliondan ortiq foydalanuvchi bergan baholar asosida shakllantirilgan.
Yangilangan reytingda dunyo bo‘ylab eng mashhur va ommaviy oshxonalar yetakchilik qilmoqda. Ularda asrlar davomida shakllangan brend, kuchli gastronomik marketing va xalqaro ommalashuv muhim rol o‘ynayotgani ta’kidlanmoqda.
Markaziy Osiyo mintaqasidan esa faqat Qozog‘iston oshxonasi ro‘yxatga kirishga muvaffaq bo‘ldi. Qo‘shni davlat milliy taomlari bilan 98-pog‘onani egalladi. Xususan, samosa, suvjo‘q, lag‘mon, kespe va bo‘rsak kabi taomlar TasteAtlas foydalanuvchilari tomonidan yuqori baholangan.
Shu bilan birga, O‘zbekiston oshxonasi atrofida bahslar avval ham bo‘lgan. Joriy yil fevral oyida o‘zbek taomlari orasida eng mashhur salatlardan biri — achchuchuk TasteAtlas tuzgan “dunyoning eng yomon taomlari” antireytingida 43-o‘rinni egallagani jamoatchilikda turli fikrlarga sabab bo‘lgan edi.
Mutaxassislar fikricha, o‘zbek oshxonasining reytinglarda kam ko‘rinishi uning mazasi yoki boy an’analari bilan emas, balki global targ‘ib, brendlash va xalqaro gastronomik maydonda faol ilgari surilmasligi bilan bog‘liq.
Qisqacha aytganda, palov, somsa va lag‘mon dunyo bo‘ylab sevib iste’mol qilinsa-da, global reytinglar uchun mazadan tashqari marketing ham hal qiluvchi ahamiyat kasb etadi. Endi masala — oshxonamizni dunyoga qanday tanita olishda.
Mehmon guruhidagi foydalanuvchilar ushbu nashrga izoh qoldira olmaydi.
