Prezident farmoniga muvofiq, O‘zbekiston aholisi Yangi yil bayrami munosabati bilan ketma-ket besh kun dam olish imkoniyatiga ega bo‘ladi. Qarorga ko‘ra, 31 dekabrdan 4 yanvargacha bo‘lgan davr to‘liq dam olish kunlari sifatida belgilandi.
Xususan, 31 dekabr — chorshanba kuni barcha xodimlar uchun qo‘shimcha dam olish kuni etib belgilangan. 1 yanvar — payshanba esa an’anaviy tarzda Yangi yil bayrami sifatida nishonlanadi. Bayram kayfiyati shu bilan cheklanib qolmaydi: 2 yanvar, juma kuni ham ish haftasi turidan qat’i nazar barcha uchun qo‘shimcha dam olish kuni hisoblanadi.
Shuningdek, 3 yanvar — shanba kuni olti kunlik ish haftasida ishlaydiganlar uchun qo‘shimcha dam olish kuni etib belgilandi. 4 yanvar — yakshanba esa odatiy dam olish kuni sifatida qoladi.
Muhimi, 31 dekabr hamda 2 yanvar kunlari ish haftasining besh yoki olti kunlik ekanidan qat’i nazar, barcha xodimlar uchun umumiy dam olish kuni hisoblanadi. Bu esa ko‘pchilik uchun Yangi yil bayramlarini xotirjam, oila davrasida va sayohatlar bilan o‘tkazish imkonini yaratadi.
Qaror aholi orasida ijobiy kayfiyat uyg‘otmoqda. Ko‘pchilik bu uzoq dam olish kunlarini yaqinlari bilan birga o‘tkazish, sayohat qilish yoki yil davomida to‘plangan charchoqni chiqarish uchun qulay imkoniyat sifatida baholamoqda. Yangi yil bayrami bu safar nafaqat bayram, balki haqiqiy dam olish fursatiga aylanadi.
Mehmon guruhidagi foydalanuvchilar ushbu nashrga izoh qoldira olmaydi.
