Shaxsiy samolyot, xizmatchilari bilan koshona va katta maosh. Neymar nega Saudiyani tanladi?

Saudiya Arabistoni — bu yozda futbolchilarning eng sevimli yoʻnalishiga aylandi. U erga butunlay boshqacha miqyosdagi futbolchilar ham yoʻl olishmoqda — «Oltin toʻp» sohiblari Ronaldu va Benzemadan tortib istiqbolli futbolchilar qatorida koʻrilgan Ruben Nevesh kabilargacha. Mane yoki Kante kalibridagi yulduzlar ham faoliyatining qolgan qismini ushbu ekzotik ligada oʻtkazishga qaror qildi.

Saudiyaliklarning eng yangi (va eng kutilmagan) xaridi — Neymarning «PSJ»dan «Al-Hilol»ga transferi boʻldi. Va bu holatda uch tomonning ham manfaatlari mushtarak edi — parijliklar futbolchidan qutulmoqchi edi, futbolchi ham vaziyatni oʻzgartirishga qarshi emasdi, Saudiya Arabistonidagilar esa shunchaki navbatdagi superyulduzni kutayotgandi.

Neymar nima uchun «PSJ»dan ketishni istadi?

Uch hafta oldin ham braziliyalik futbolchining ketishiga hech kim ishonmasdi. Koʻp jihatdan shuning uchunki, uning oʻzi bunday ehtimolni rad etib chiqqandi. «Mening kelajagimga keladigan boʻlsak, «PSJ»da qolishga umid qilaman. Mening bu klub bilan shartnomam bor. Hatto muxlislar mendan nafratlanishsa ham, men shu erda qolaman», — deya ishontirgandi Neymar iyul oyi oʻrtalarida.

L`Equipe manbalari tasdiqlagandi: futbolchi Parijda oʻzini qulay his qilayotgan, uni maoshi qoniqtirayotgan, professional ambitsiyalari esa faqat Evropa bilan bogʻliq edi. Ammo barchasi boshqacha boʻlib chiqdi.

Frantsuz mediasi ma'lumotiga koʻra, Neymar «PSJ»dan ketish haqida may oyida oʻylay boshlagan (alohida manbalarga koʻra esa — yanvar oyidayoq). Buning asosiy sabablaridan biri muxlislar isyoni eli — Parijdagi torsida braziliyalikdan nafratlangan va hatto uning uyi qarshisida miting uyushtirgan. Bularning bari hujumchini qoʻrqitib yuborgan va etarlicha noqulaylik keltirib chiqargan.

Klubdagilar ham Chempionlar ligasida ketma-ket muvaffaqiyatsizlikka uchralgach, Neymar — Mbappe — Messining yulduzli triosidan norozi boʻlgan va bu futbolchilarga nisbatan taktikani oʻzgartirmoqchi edi. Bundan dastlab Lionel jabr chekdi — u klub rahbariyatining roziligini olmasdan, nooʻrin vaqtda (oʻshanda klub shov-shuvli tarzda Frantsiya chempionatida «Loryan»dan magʻlubiyatga uchragandi) Saudiya Arabistoniga borib kelgani uchun jazolangan va hatto rasman uzr soʻrashga majbur qilingandi. Shu tariqa, «PSJ»dagilar yulduzlar davri yakunlangani, klub har qanday futbolchidan ustun turishini koʻrsatib qoʻymoqchi boʻlgandi. Yakunda Messi Parijni tark etdi.

Keyin esa Mbappe bilan bogʻliq tarix boshlandi, bunda ham rahbariyat qat'iy pozitsiya egalladi: shartnomasini uzaytirmasligini bildirgan frantsuz hujumchisi mavsumoldi turnesidan tushirib qoldirildi va unga butun mavsum davomida zaxira oʻrindigʻida qoldirish bilan tahdid qilindi.

Ammo yakunda Kilian qoladigan boʻldi, matbuotda esa uning Neymar bilan murakkab munosabatlari haqida ma'lumotlar paydo boʻldi: L`Equipe ma'lumotiga koʻra, Mbappe bir yil oldin u va braziliyalik bir tarkibda boʻlmasligi kerakligini uqtirgandi.

Neymar bunday muhitda qolishni istamasligi tabiiy edi.

Neymar qanday ketdi: oʻz xizmatlarini «MYu»ga, «Bavariya»ga va hatto «Barselona»ga ham taklif etdi

Parijliklarning Neymar bilan bogʻliq vaziyatdagi taktikasi Mbappe va Messi keyslaridan deyarli farq qilmadi — klub shunchaki norozi futbolchisini transferga qoʻyib yubordi. Frantsuzlarning sharti oddiy edi — yaxshi pul ishlab olish (kamida 90 million evro), hech kim forvardni qolishga koʻndirishga urinib koʻrmadi.

Luis Enrike ochiqchasiga braziliyalik futbolchi uning rejalaridan oʻrin olmaganini aytdi. Singillarining tugʻilgan kunlari, yana qandaydir bazmlar, eng muhim pallalarda olingan jarohatlar – 2017 yildan buyon Neymarda 30 tadan ortiq oʻyin oʻtkazilgan birorta mavsum boʻlmagan.

Transfer uchun yuqori narx soʻralishi, shuningdek futbolchining oʻzining katta maoshi (uning Parijdagi yillik maoshi 25 million evro atrofida edi) hisobga olinsa, Evropada yangi jamoa topish muammo edi, shu tufayli darhol bu yozning eng badavlat ligasi birinchi planga chiqdi — Saudiya Arabistoni. Shu zahoti «Al-Hilol» bilan bogʻliq mish-mishlar tarqaldi (bu klub avvalroq Messi uchun aql bovar qilmas shartnoma taklif qilgan, ammo argentinalik yulduz okeanortiga ketishni ma'qul koʻrgandi).

Ammo Neymarning oʻzi, aftidan, Saudiya variantini u qadar istamasdi. The Independent xabariga koʻra, forvard oʻz xizmatlarini Evropa top-klublariga taklif qilib chiqqan — «MYu»dan tortib «Bavariya»gacha. Ammo hech kim qiziqish bildirmagan.

Braziliyalik futbolchi borib qoʻshilishni istagan jamoalar roʻyxatida «Barselona» nomi ham bor edi. Kataloniya klubidagilar ham Neymarning qaytishiga qarshi emasdi — Xavidan tashqari. Ispan nashrlariga koʻra, murabbiy bunday ehtimoliy kelishuvga qat'iyn qarshi turgan. Lekin uning taqiqisiz ham bu transfer amalga oshishi ehtimoli deyarli nolga teng edi — «Barselona»da uni ijaraga olish uchun ham imkon yoʻq edi: «PSJ» 90 million evrodan kam offerlarni koʻrib chiqmasdi.

Shunday ekan, «Barsa» Neymarni safga qoʻshib olish gʻoyasidan juda tez voz kechdi. Shundan keyin braziliyalik «Al-Hilol» taklifini qabul qildi va bu bilan juda ajoyib shartnomaga ega chiqdi — Evropada bunaqasini orzu qilish ham qiyin.

Saudiya Arabistonida Neymar uchun barchasi muhayyo: unga hatto ijtimoiy tarmoqdagi postlari uchun alohida toʻlanadi

Tabiiyki, saudiyaliklar superyulduz va uning sobiq klubini xafa qilishmadi. Turli manbalarga koʻra, «PSJ» Neymar uchun 90 million evrodan 120 million evrogacha (bonuslar bilan birga) pul ishlab olgan, braziliyalik futbolchining oʻziga esa unikal shartnoma berilgan.

Sky Sports ma'lumotiga koʻra, hujumchi yiliga 150 million evro maosh bilan ta'minlanadi. Globo Esporte nashri aniqlik kiritishicha, summa biroz kattaroq: ikki mavsum uchun uning hisobiga 320 million evro tushirib beriladi (yiliga 160 mln evro maosh – oyiga 12,5 mln, kuniga 410 ming, soatiga 17,1 ming, daqiqasiga 285 evro degani).

Bundan tashqari:

• shaxsiy foydalanish uchun xususiy samolyot;
• toʻliq jihozlangan (25 ta yotoqxona, 40x10 hajmdagi basseyn va uchta sauna) va 5 nafar xizmatkorlari boʻlgan koshona;
• Bentley Continental GT, Aston Martin DBX va Lamborghini Huracán avtomobillari, 24 soat xizmatida boʻladigan haydovchi;
• uning dam olish kunlarida mehmonxonalar, restoranlar va boshqa turli xizmatlar uchun hisoblar toʻlash uchun klub qarorgohiga yuboriladi;
• ijtimoiy tarmoqlarda Saudiya Arabistonini targʻib etuvchi har bir post yoki «storiz» uchun 500 ming evro;
• «Al-Hilol»ning har bir gʻalabasi uchun 80 ming evro miqdorida mukofot puli.

Shuningdek, unga hali oʻzi nikohdan oʻtmagan sevgilisi bilan birga yashashga ruxsat beriladi.

Albatta, Evropada hech kim unga bunga oʻxshash takliflar bera olmasdi, shuning uchun uning qarorini toʻgʻri tushunish mumkin. Ammo baribir masalaning ruhiy tomoni bor — Neymar anchadan buyon Chempionlar ligasida gʻolib chiqmagan va Osiyoda oʻynash orqali oʻz faoliyatini tugatib qoʻyish xavfi ostida qolgan. Uning shartnomasida ijara asosida «Barselona»ga oʻtish boʻyicha lazeyka yoʻq (saudiyaliklar Messi uchun shunday imkoniyat va'da qilishgani haqida xabarlar chiqqandi). ammo braziliyalik taslim boʻlmoqchi emas: L`Equipe xabariga koʻra, futbolchi ikki yildan keyin «Al-Hilol» bilan shartnomani uzaytirish toʻgʻrisidagi bandni faollashtirmaydi, chunki Saudiya Arabistonidagi ikki yildan keyin erkin agent sifatida «Barsa»ga qaytishdan umid qilmoqda. U maqsadiga erisha oladimi - buni vaqt koʻrsatadi.

Шухрат Раззаков

«ZAMIN.UZ» muharriri