Rossiyalik mashhur jangchi Umar Nurmagomedov yaqinda “UFC 311” turnirida gruziyalik raqibi Merab Dvalishvilidan mag‘lubiyatga uchragandi. Bu natija ko‘plab muxlislar va mutaxassislar uchun kutilmagan bo‘ldi. Oradan vaqt o‘tgach, Umar ustozi va yaqin qarindoshi — sobiq chempion Xabib Nurmagomedovning o‘sha kuni aytgan so‘zlarini esga oldi.
“Xabib har bir sportchiga alohida yondashadi, har kimga o‘z holatiga yarasha so‘z topadi. O‘sha kuni u yonimga keldi va shunchaki: ‘Biz albatta qaytamiz. Faqat keyingi safar yanada kuchliroq bo‘lib!’ — dedi. Shu gap men uchun juda muhim bo‘ldi. Uning doimgi qo‘llab-quvvatlovi va ishonchi menga yangi kuch beradi”, — dedi 29 yoshli Umar Nurmagomedov.
Jangchi ta’kidlashicha, mag‘lubiyat unga jiddiy saboq bo‘lgan va hozir u o‘z ustidan yanada ko‘proq ishlayapti. “Hozir har kuni yangi strategiyalar ustida ishlayapman. O‘zimni yanada to‘liq shakllantirishni maqsad qilganman. Tez orada yangi Umarni ko‘rasiz”, — deya ishonch bilan qo‘shimcha qildi u.
Eslatib o‘tamiz, Umar Nurmagomedovning navbatdagi jangi 25-oktyabr kuni “UFC 321” turnirida bo‘lib o‘tadi. Unda rossiyalik sportchi amerikalik raqibi Mario Bautistaga qarshi oktagonga ko‘tariladi.
Jang atrofida katta qiziqish kuzatilmoqda. MMA ekspertlari bu gal Umarning jismoniy va ruhiy jihatdan ancha tayyor ekanini ta’kidlashmoqda. Uning so‘zlariga ko‘ra, bu jang nafaqat revansh, balki o‘zining haqiqiy salohiyatini ko‘rsatish uchun ham muhim sinov bo‘ladi.
Shu tariqa, Nurmagomedovlar sulolasining navbatdagi vakili yana oktagon markazida o‘z so‘zini aytmoqchi.
“Zamin”ni Telegramʻda oʻqing!
