Futbol eksperti Aleksandr Tochilin «Yevro-Futbol.Ru»ga bergan eksklyuziv intervyusida FIFA prezidenti Janni Infantinoning Rossiyaga qo‘yilgan taqiq bo‘yicha fikrlari va OAVda tarqalgan — MOK yaqin orada Rossiya sportiga nisbatan barcha sanksiyalarni bekor qilishi mumkinligi haqidagi xabarlarga munosabat bildirdi. Bu haqda euro-football.ru xabar beradi.
Mutaxassisning aytishicha, MOK bu borada chindan ham prinsipial qaror qabul qilsa, bunga ishonishni istaydi. Uning fikricha, Rossiyaning yirik musobaqalardan chetlatilishi uzoq davom etmoqda va Yevropadan aniq siyosiy qaror bo‘lmas ekan, izolyatsiyani tugatish qiyin. Tochilin shuningdek, Rossiyasiz katta turnirlarning intriga va ommabopligi pasayishini ham ta'kidladi.
Infantinoning rossiyalik jamoalarni chetlatish “ma'nosiz” ekani haqidagi bayonotiga to‘xtalgan Tochilin, dunyoda Rossiyaga nisbatan ikki xil standartlar va biryoqlama yondashuv kuzatilayotganini aytdi. Shu bilan birga, u vaziyat o‘zgarayotganini, taqiqning o‘zi esa tobora “absurd” ko‘rinish olayotganini qayd etdi.
Tochilin MOK sanksiyalarni bekor qilsa, bu futbolga ham bevosita ta'sir ko‘rsatishini istisno etmadi. Uning so‘zlariga ko‘ra, bunday holatda “zanjirli reaksiya” yuz beradi: boshqa tashkilotlar ham o‘z qarorlarini qayta ko‘rib chiqishga majbur bo‘ladi. Ekspert bu jarayonda eng muhim savol “kim birinchi bo‘ladi” degan masala ekanini ta'kidladi.
Infantino kelajakda siyosat sabab jamoalarni musobaqalardan chetlatishni qonunan taqiqlash kerakligini aytgani ham eslatildi. Tochilin esa sportning bosh shiori — u siyosatdan xoli bo‘lishi lozimligini, ammo Rossiyaga nisbatan qabul qilingan qarorlar aynan shu tamoyilga zid kelayotganini bildirdi.
OAVda FIFA aprel oyidagi navbatdagi kongressda Rossiyaning xalqaro turnirlarga to‘liq qaytishi masalasini muhokama qilishi mumkinligi haqida yozilmoqda. Tochilin bunday muddatlarda qaytish ehtimolini inkor etmadi va bu kabi ma'lumotlar “bekordan-bekorga” tarqamayotganini aytdi.
Shuningdek, Rossiya qaytganidan keyin ham ayrim raqiblar maydonga tushishdan bosh tortishi mumkinligi haqidagi savolga ekspert reglamentni eslatdi. Uning fikricha, qaysi sabab bo‘lishidan qat'i nazar, qoidabuzarlik bo‘lsa, intizomiy choralar qo‘llanishi shart. Texnik mag‘lubiyatlar berilishi boshqalarga ham signal bo‘lib, bunday demarshlar oxir-oqibat o‘ziga zarar keltirishini ko‘rsatadi.
Elena Grigoryevskaya
“Zamin”ni Telegramʻda oʻqing!
