Yamal uchun mavsum yakunlandimi: JCH-2026da ishtirok etishi ham soʻroq ostida
"Barselona" vingeri Lamin Yamal "Selta"ga qarshi bahsda jiddiy jarohat olib, mavsumning qolgan qismini o'tkazib yuborishi mumkin. Dastlabki ma'lumotlarga ko'ra, futbolchining son mushaklari shikastlangan, bu esa uning 2026-yilgi Jahon chempionatidagi ishtirokini ham so'roq ostida qoldirmoqda. Bugun o'tkaziladigan qo'shimcha tibbiy ko'riklar jarohatning aniq darajasi va tiklanish muddatini belgilab beradi. Ushbu kutilmagan yo'qotish ham klub, ham Ispaniya terma jamoasi uchun jiddiy muammoga aylanishi taxmin qilinmoqda.
Lamin Yamal La Liga doirasidagi «Selta»ga qarshi bahsda (1:0) noxush holatga duch keldi. «Barselona» vingeri uchrashuvning birinchi boʻlimi yakuniga yaqin jarohat olib, maydonni majburan tark etdi.
Mundo Deportivo tarqatgan dastlabki maʼlumotlarga koʻra, tekshiruvlar futbolchining son orqa qismi mushagida jiddiy shikast borligini koʻrsatmoqda. Bu holat uning tiklanish muddati uzoqqa choʻzilishi mumkinligidan darak beradi.
Agar ushbu tashxis rasman tasdiqlansa, 18 yoshli iqtidor egasi mavsumning qolgan qismida maydonga tusha olmasligi ehtimoli yuqori. Bu esa nafaqat klub, balki milliy jamoa uchun ham katta yoʻqotish boʻlishi mumkin.
Shuningdek, Yamalning boʻlajak Jahon chempionatida ishtirok etishi ham soʻroq ostida qolmoqda. Ayniqsa, turnirning ilk uchrashuvlarida uning maydonda koʻrinish ehtimoli ancha pasayishi mumkin.
Bugun, 23 aprel kuni futbolchi qoʻshimcha tibbiy koʻrikdan oʻtkaziladi. Ana shundan keyin jarohatning aniq darajasi va tiklanish muddati haqida toʻliq xulosa berilishi kutilmoqda.
Qisqasi, Yamal bilan bogʻliq vaziyat «Barselona» uchun ham, Ispaniya terma jamoasi uchun ham jiddiy bosh ogʻriqqa aylanishi mumkin. Endi barcha eʼtibor uning tezroq safga qaytishiga qaratilgan.
Izohlar 0
…