“O‘zgidromet” ma’lumotiga ko‘ra, 17 aprelda O‘zbekiston bo‘ylab ob-havo barqaror bo‘lmaydi. Ayrim hududlarda yomg‘ir, ba’zi joylarda esa momaqaldiroq kuzatilishi mumkin. Shu bilan birga, respublikaning ko‘p qismida salqin va nam havo saqlanib qoladi.
Toshkent shahrida ob-havo o‘zgaruvchan bo‘ladi. Qisqa muddatli yomg‘ir va momaqaldiroq ehtimoli bor. Shamol sharq tomonga o‘zgarib, 3–8 m/s tezlikda esadi. Harorat kechasi 9–11°, kunduzi 14–16° atrofida bo‘ladi.
Qoraqalpog‘iston va Xorazmda asosan bulutli, lekin yog‘ingarchilik kutilmaydi. G‘arbiy shamol 7–12 m/s tezlikda esadi. Havo kechasi 5–10°, kunduzi 12–17° atrofida bo‘ladi.
Buxoro va Navoiyda ham asosan quruq va o‘zgaruvchan havo saqlanadi. Yomg‘ir kuzatilmaydi. Shamol 9–14 m/s tezlikda g‘arbdan esadi. Harorat kechasi 6–11°, kunduzi 15–20° bo‘ladi.
Toshkent, Sirdaryo, Jizzax va Samarqandda vaziyat biroz noqulayroq. Ayrim joylarda qisqa muddatli yomg‘ir, ba’zi hududlarda momaqaldiroq bo‘lishi mumkin. Shamol 7–12 m/s. Harorat kechasi 6–11°, kunduzi 13–18° atrofida.
Qashqadaryo va Surxondaryoda nisbatan barqaror ob-havo saqlanadi. Yog‘ingarchilik kutilmaydi. Shamol 7–12 m/s. Havo kechasi 6–11°, kunduzi 17–22° bo‘ladi.
Farg‘ona vodiysi (Andijon, Namangan, Farg‘ona)da esa yana yomg‘ir ehtimoli bor. Qisqa muddatli yog‘ingarchilik va ba’zi joylarda momaqaldiroq kuzatiladi. Shamol 5–10 m/s. Harorat kechasi 8–13°, kunduzi 13–18° atrofida.
Tog‘li hududlarda vaziyat eng jiddiyroq. Vaqti-vaqti bilan yomg‘ir yog‘adi, yuqori tog‘larda esa qorga aylanishi mumkin. Sel va suv toshqinlari xavfi ham saqlanadi. Shamol 7–12 m/s. Harorat kechasi -3…+2°, kunduzi +3…+8° bo‘ladi.
“O‘zgidromet” avvalroq 14–17 aprel kunlari mamlakatga nam va salqin havo massalari kirib kelishi haqida ogohlantirgan edi. Shu sababli harorat pasayishi, yomg‘irlar kuzatilishi va tog‘li hududlarda qorga aylanish holatlari qayd etilmoqda. Hatto 16 aprelda Jizzaxning Zomin va Baxmal tumanlari tog‘larida qor yog‘gani ham kuzatildi.
“Zamin”ni Telegramʻda oʻqing!
