Belaruslik sobiq futbolchi Aleksandr Gleb «Arsenal»ning joriy Chempionlar ligasi mavsumidagi imkoniyatlari haqida fikr bildirdi. Bu haqda euro-football.ru xabar beradi.
Uning aytishicha, «kanonirlar» turnirning umumiy bosqichini juda yuqori saviyada o‘tkazdi. Shunga qaramay, Gleb hozircha musobaqa uchun bitta aniq favoritni ajratish qiyinligini ta’kidladi.
«Hammasi 1/8 final ishtirokchilari to‘liq ma’lum bo‘lgach, yanada ravshanlashadi. Lekin albatta, sobiq klubim Chempionlar ligasini yutsa yoki hech bo‘lmasa finalgacha borsa, bundan xursand bo‘laman», — dedi Gleb «RB Sport»ga.
Shuningdek, Gleb finalda ikki hujumkor, o‘yinni o‘zi boshqarishga intiladigan jamoani ko‘rishni istashini qo‘shimcha qildi.
Ma’lumot uchun, «Arsenal» Chempionlar ligasining umumiy bosqichini birinchi o‘rinda yakunladi va sakkizta uchrashuvning barchasida g‘alaba qozondi. «Kanonirlar» yangi formatda bunday natijaga erishgan ilk jamoa bo‘ldi.
“Zamin”ni Telegramʻda oʻqing!
