Yevropa futboli markazida turgan UYEFA Chempionlar ligasi yarimfinal bahsi oldidan Fransiya prezidenti Emmanuel Makron oʻz prognozi bilan oʻrtoqlashdi. Davlat rahbari Pari Sen-Jermen hamda "Bavariya" oʻrtasidagi toʻqnashuv haqida gapirib, parijliklarga ishonch bildirgan edi.
Makron L’Équipe'ga bergan intervyusida oʻzining shaxsiy klubi boshqa jamoa ekanini yashirmadi:
«Men “Marsel” muxlisiman, lekin bugun “PSJ” oʻynayapti. Shuning uchun ularni qoʻllab-quvvatlayman. Menimcha, ular 3:1 hisobida gʻalaba qozonadi», — deb aytgan edi u.
Maʼlumki, mazkur yarimfinalning ilk uchrashuvi Parijdagi Park de Prensda boʻlib oʻtdi. Javob bahsi esa 6 may kuni Germaniyadagi Myunxen Arenada tashkil etiladi.
Har ikki jamoa ham yarimfinalga ishonchli oʻyinlar orqali yetib keldi. Parijliklar chorakfinalda "Liverpul"ni ikki oʻyin natijasiga koʻra 4:0 hisobida magʻlub etib, oʻz kuchini namoyon etgan edi. Myunxenliklar esa "Real Madrid" ustidan 6:4 hisobida gʻalaba qozonib, yarimfinalga yoʻl olgan edi.
Mutaxassislar fikricha, bu juftlik finalga teng bahs sifatida baholandi. Har ikki jamoa ham yuqori saviyadagi futbolchilarga ega va hal qiluvchi lahzalarda natijani oʻzgartirishga qodir.
Qisqasi, Parijdagi birinchi oʻyin katta intriga va kurashlarga boy boʻlishi kutilgan edi va shunday ham boʻldi. Makron esa oʻz taxminini bildirib faqat hisobda adashdi, xolos. Gollarga boy va keskin kurashlar ostida kechgan bahsda PSJ "Bavariya"ni 5:4 hisobida magʻlub etib, muhim gʻalabani qoʻlga kiritdi.
