Futbol eksperti Aleksandr Tochilin «Yevro-Futbol.Ru» nashriga bergan intervyusida FIFA prezidenti Janni Infantinoning Rossiya jamoalariga qoʻyilgan taqiqni bekor qilish haqidagi fikrlari hamda МОК yaqin orada Rossiya sportiga nisbatan barcha sanksiyalarni olib tashlashi mumkinligi haqidagi xabarlarga munosabat bildirdi. Bu haqda euro-football.ru xabar beradi.
Tochilinning aytishicha, ommaviy axborot vositalarida tilga olinayotgan, Milandagi МОК yigʻilishida sanksiyalarni bekor qilish bo‘yicha prinsipial qaror qabul qilingani haqidagi gaplarga ishonishni istaydi. U bunday masala uzoq vaqtdan beri muhokama qilinayotganini, izolyatsiyani tugatish uchun Yevropa darajasida qat’iy qaror zarurligini ta’kidladi.
Ekspertning fikricha, xalqaro sport hamjamiyati Rossiyasiz yirik musobaqalarning intriga va ommabopligi pasayishini ham yaxshi tushunadi. Shuning uchun u bu bayonotlar amaliy qadamlar bilan mustahkamlanishiga umid bildirdi.
Infantinoning Rossiya jamoalarini chetlatish “ma’nosiz” degan pozitsiyasiga to‘xtalgan Tochilin buni dunyoda kuzatilayotgan umumiy tendensiya bilan izohladi. U Rossiyaga nisbatan ikki xil standart va biryoqlama yondashuvlar borligini aytar ekan, vaqt o‘tishi bilan bunday ban “absurd holat” ekani ko‘proq anglanayotganini qo‘shimcha qildi.
Tochilin МОК sanksiyalarni olib tashlasa, bu futbolga ham bevosita ta’sir qilishini qayd etdi. Uning fikricha, bunday qaror zanjirli reaksiya keltirib chiqaradi va boshqa sport tashkilotlari ham avvalgi qarorlarini qayta ko‘rib chiqishga majbur bo‘ladi.
“Bu yerda eng muhimi — kim birinchi bo‘ladi”, deya ta’kidladi u. Tochilincha, МОК kabi yirik tuzilma precedenti yuzaga keltirsa, nisbatan kichikroq tashkilotlar ham o‘sha yo‘ldan borishi ehtimoli yuqori.
Infantino kelajakda siyosat sabab jamoalarni chetlatishni qonuniy jihatdan taqiqlash kerakligini aytgani borasida esa Tochilin sportning asosiy shiori siyosatdan xoli bo‘lishi kerakligini eslatdi. Uningcha, Rossiyaga nisbatan qabul qilingan qarorlar aynan shu tamoyilga zid.
Shuningdek, OAVda FIFA aprel oyidagi kongressda Rossiyaning xalqaro turnirlarga to‘liq qaytishi masalasini ko‘rib chiqishi mumkinligi haqidagi xabarlar ham muhokama qilindi. Tochilin bunday suhbatlar bor ekan, qaytish ehtimolini inkor etmadi va bu ma’lumotlar “bekordan-bekor” chiqmayotganini ta’kidladi.
Ekspert Rossiya qaytgan taqdirda ham ayrim jamoalar maydonga tushishdan bosh tortishi mumkinligini tan oldi. Uning fikricha, bunday vaziyatlarda har bir tashkilot o‘z reglamenti asosida ish yuritishi, qoidabuzarlik bo‘lsa intizomiy choralar qo‘llanishi kerak.
Tochilinning aytishicha, agar kimlargadir texnik mag‘lubiyat yozilsa, bu boshqalarga ham signal bo‘ladi. U bunday demarshlar hech kimga foyda keltirmasligini, aksincha, rad etayotgan tomonning o‘ziga zarar bo‘lishi mumkinligini ta’kidladi.
“Zamin”ni Telegramʻda oʻqing!
