Manchester Siti yarim himoyachisi Rodri klub bilan yangi shartnoma imzolashga shoshilmayotganini ma'lum qildi. Ispaniyalik futbolchi hozirgi vaqtda shaxsiy kelishuvlardan ko'ra, Pep Gvardiola jamoasining Angliya Premer-ligasidagi chempionlik poygasiga e'tibor qaratishni muhimroq deb hisoblaydi. Bu haqda Goal.com xabar beradi.
Marca nashriga bergan intervyusida Rodri kelajagi borasidagi mish-mishlarga izoh berar ekan, o'zini xotirjam tutayotganini ta'kidladi. Uning so'zlariga ko'ra, hozirgi asosiy vazifa mavsumni maksimal darajada ko'p sovrinlar bilan yakunlash va Angliya Premer-ligasi chempionligini qo'lga kiritishdir.
Arsenal jamoasining kuchli bosimi ostida o'tayotgan chempionat poygasida har bir ochko muhim ahamiyatga ega. Rodri jamoasining muvaffaqiyati uchun barcha kuchini sarflashga tayyorligini va shartnoma masalalarini mavsum yakuniga qadar ortga surganini qayd etdi.
Yaqinda jarohatidan forig' bo'lib maydonga qaytgan yarim himoyachi, Chelsi ustidan qozonilgan g'alaba va Angliya kubogidagi muvaffaqiyatdan so'ng o'zini yaxshi his qilayotganini aytdi. Garchi u hali o'zining eng yaxshi sport formasida emasligini tan olgan bo'lsa-da, yaqin haftalar ichida to'liq tiklanishiga ishonchi komil.
“Zamin”ni Telegramʻda oʻqing!
