Cristiano Ronaldo va uning Al-Nassr jamoasi uchun mavsumdagi navbatdagi sovrin orzusi barbod bo‘ldi. Saudiya Arabistonining nufuzli klubi o‘z maydonida o‘tgan Osiyo Chempionlar ligasi 2 finalida Yaponiyaning Gamba Osaka jamoasiga imkoniyatni boy berib qo‘ydi. King Saud University stadionida kechgan bahsda mezbonlar yaqqol favorit sanalishiga qaramay, kutilmagan natija qayd etildi. Bu haqda Goal.com xabar beradi.
Uchrashuvning 30-daqiqasida Gamba Osaka hujumchisi Deniz Hummet Issam Jebalining uzatmasidan so‘ng darvozani aniq nishonga olib, o‘yin taqdirini hal qilgan yagona gol muallifiga aylandi. Jorge Jesus shogirdlari o‘yin davomida to‘p nazoratini o‘z qo‘lida ushlab turgan bo‘lsa-da, raqib himoyasini yorib o‘tishda qiynalishdi.
Ikkinchi bo‘limda Al-Nassr bosimni yanada kuchaytirdi. Biroq, yaponiyalik 18 yoshli darvozabon Rui Araki o‘z darvozasini daxlsiz saqlab qolish uchun bir nechta seyv namoyish etdi. Xususan, Joao Felixning kuchli zarbasi darvoza ustuniga tegib qaytgan bo‘lsa, Cristiano Ronaldo va Sadio Manening urinishlari ham samarasiz yakunlandi.
O‘yinning 86-daqiqasida Genta Miuraning qahramonlarcha amalga oshirgan bloki Cristiano Ronaldoni gol urishdan mahrum qildi. Yakunda Gamba Osaka intizomli himoya evaziga g‘alabani saqlab qoldi va Osiyo Chempionlar ligasi 2 kubogini qo‘lga kiritdi.
“Zamin”ni Telegramʻda oʻqing!
