Xitoyning premium avtomobil brendi bo‘lmish Hongqi o‘zining vakillik toifasidagi Guoya sedanini Rossiya bozoriga olib chiqishini tasdiqladi. L1 indeksi bilan ham tanilgan ushbu modelning taqdimoti 2026-yilning birinchi yarmi yakuniga qadar bo‘lib o‘tadi. Yangi avtomobil brendning o‘z ishlanmasi bo‘lgan ikkita kuchli dvigatel bilan taqdim etiladi. Bu haqda Ixbt.com xabar beradi.
Boshlang‘ich versiya 3,0 litrli, 380 ot kuchiga ega V6 biturbo dvigateli bilan jihozlanadi. U 100 km/soat tezlikka 5,5 soniyada erishadi. Yanada qudratliroq modifikatsiya esa 4,0 litrli V8 dvigateli bilan ta’minlangan bo‘lib, 476 ot kuchi va 680 N·m aylanma momentni taqdim etadi. Bu versiya 100 km/soat tezlikni atigi 4,5 soniyada bosib o‘tadi.
O‘lchamlari bo‘yicha Guoya flagman sedanlar sinfiga kiradi: uzunligi 5353 mm, kengligi 1998 mm, g‘ildirak bazasi esa 3260 mm ni tashkil etadi. Hongqi ushbu modelni Mercedes-Maybach S-Class ga to‘g‘ridan-to‘g‘ri raqobatchi sifatida ko‘rmoqda. Shuningdek, u Audi A8 Horch va BMW 7-seriyasi kabi nemis avtomobillariga munosib muqobil bo‘lishi kutilmoqda.
Avtomobil saloni Nappa terisi va qimmatbaho yog‘och turlari bilan bezatilgan. Orqa o‘rindiqdagi yo‘lovchilar uchun massaj, ventilyatsiya funksiyalari va alohida ekranlar ko‘zda tutilgan. Shuningdek, jihozlar ro‘yxatidan premium audio tizim, proyeksion displey, adaptiv kruiz-nazorat va faol shovqinni pasaytirish tizimi o‘rin olgan.
“Zamin”ni Telegramʻda oʻqing!
