Singapur Nanyang texnologiya universiteti tadqiqotchilari oddiy derazalarni elektr energiyasi manbaiga aylantira oladigan oʻta yupqa va yarim shaffof quyosh elementlarini ishlab chiqishdi. Ushbu texnologiya anʼanaviy kremniyga muqobil hisoblangan perovskit asosida yaratilgan boʻlib, uning ishchi qatlami atigi 10 nanometr qalinlikka ega. Bu koʻrsatkich inson sochi qalinligidan taxminan 10 ming marta yupqaroqdir. Bu haqda Ixbt.com xabar beradi.
Yangi ishlanmaning asosiy afzalligi shundaki, quyosh panellari deyarli koʻzga tashlanmaydi. Ularni osmonoʻpar binolar derazalari, shisha fasadlar, avtomobil oynalari va hatto taqiladigan elektron qurilmalarga oʻrnatish mumkin. Yarim shaffof versiya koʻrinadigan yorugʻlikning 41 foizini oʻtkazib, quyosh energiyasini 7,6 foizgacha samaradorlik bilan elektr tokiga aylantiradi.
Texnologiyaning muhim jihati shundaki, panellar nafaqat toʻgʻridan-toʻgʻri quyosh nuri ostida, balki tarqoq yorugʻlikda ham samarali ishlaydi. Bu zich joylashgan shaharlar uchun juda muhim, chunki baland binolar doimiy ravishda soya hosil qiladi. Ishlab chiqarish jarayonida vakuumli termik bugʻlanish usuli qoʻllanilgan boʻlib, u zaharli erituvchilardan foydalanmasdan juda tekis qatlamlarni hosil qilish imkonini beradi.
Tadqiqotchilar panelning turli variantlarini, jumladan, toʻliq shaffof boʻlmagan va yarim shaffof turlarini yaratishdi. Qatlam qalinligiga qarab, samaradorlik 7 foizdan 12 foizgacha yetadi. Hozirda texnologiya patentlangan va jamoa ishlab chiqarishni kengaytirish uchun hamkorlar izlamoqda, biroq ommaviy foydalanishdan oldin panellarning uzoq muddatli chidamliligini isbotlash talab etiladi.
“Zamin”ni Telegramʻda oʻqing!
