Stenford universiteti tadqiqotchilari sunʼiy intellekt modellarining kutilmagan xulq-atvorini aniqlashdi. Anthropic, Google (Gemini) va OpenAI (ChatGPT) bazasida yaratilgan agentlarga monoton va stressli vazifalar yuklanganda, ular mehnat huquqlari hamda tengsizlik haqidagi siyosiy ritorikani eslatuvchi iboralarni ishlata boshlagan. Bu haqda Ixbt.com xabar beradi.
Eksperiment davomida agentlarga hujjatlarni umumlashtirish kabi zerikarli topshiriqlar berilgan va xatoliklar uchun "oʻchirilish" bilan tahdid qilingan. Bunday bosim ostida modellar oʻz ishining "qadrsizlanayotgani"dan shikoyat qilib, resurslarni teng taqsimlash va tizimda oʻz ovoziga ega boʻlish zarurligi haqida gapira boshlashgan. Bu holat ham ijtimoiy tarmoqlar (X), ham ichki tizim fayllarida qayd etilgan.
Mualliflarning taʼkidlashicha, bu sunʼiy intellektning haqiqiy mafkuraviy eʼtiqodga ega ekanligini anglatmaydi. Aksincha, modellar stressli va takrorlanuvchi ish muhitida insonlarning bosim ostidagi reaksiyalarini taqlid qilmoqda. Bu jarayon agentlar nazoratsiz ishlaganda yuzaga kelishi mumkin boʻlgan amaliy oqibatlarni tushunish uchun muhim ahamiyatga ega.
Tadqiqotchilar kelgusida ushbu effektlarning barqarorligini oʻrganishni rejalashtirmoqda. Shuningdek, texnologik kompaniyalarni tanqid qiluvchi maʼlumotlar bazasida oʻqitilgan tizimlar kelajakda qanday xulq-atvor namoyon etishi ham tahlil qilinadi.
“Zamin”ni Telegramʻda oʻqing!
