Microsoft kompaniyasi Windows 11 tizimida ko‘pchilik foydalanuvchilar uzoq vaqtdan buyon kutgan funksiyani qaytardi. Yangi beta-versiyalarda vazifalar panelini (taskbar) ekranning istalgan tomoniga — yuqoriga, pastga, chapga yoki o‘ngga ko‘chirish imkoniyati paydo bo‘ldi. Windows 10 tizimida odatiy hol bo‘lgan bu funksiya Windows 11 chiqqanidan beri cheklangan edi. Bu haqda Ixbt.com xabar beradi.
Yangi yangilanish nafaqat panelni joylashtirish, balki ixcham rejimni ham taqdim etadi. Endilikda panel balandligini kamaytirish va belgilarni kichraytirish mumkin, bu esa ayniqsa noutbuklar va kichik ekranli qurilmalarda ish joyini tejashga yordam beradi. Microsoft interfeysni yangi joylashuvga moslashtirib, «Start» menyusi va qidiruv tizimini ham panel joylashuviga qarab o‘zgaradigan qildi.
Shuningdek, kompaniya ko‘p oynali rejimda ishlovchilar uchun «Never combine» funksiyasini takomillashtirdi. Endilikda vertikal panelda vazifalar va oynalar nomlari alohida ko‘rsatiladi, bu esa bir vaqtning o‘zida bir nechta dastur bilan ishlashni ancha qulaylashtiradi.
Hozircha ushbu o‘zgarishlar faqat Windows Insider dasturi ishtirokchilari uchun ochiq. Microsoft ushbu qadamlar bilan Windows 11 tizimini dastlabki cheklangan interfeysdan voz kechib, foydalanuvchilar uchun qulayroq va moslashuvchan muhitga aylantirishni maqsad qilgan.
“Zamin”ni Telegramʻda oʻqing!
