Madridning sobiq "Real" darvozaboni Keylor Navas Vinisius Juniorni qo'llab-quvvatladi. "Qaymoqranglilar" hujumchisi o'z ta'kidlashicha, Chempionlar ligasida "Benfika"ga qarshi o'yinda irqchilik ruhidagi haqoratlarga duch kelgan va buni raqib jamoa vingeri Janluka Prestianniga bog'lagan. Bu haqda euro-football.ru xabar beradi.
Navasning aytishicha, Vinisius bilan sodir bo'lgan voqea uni juda ranjitgan: bunday holat hech kim bilan yuz bermasligi kerak. U shaxsiy tanishingiz bo'lgan futbolchi jabrlansa, og'riqni yanada chuqurroq his qilishingizni ta'kidladi va bunday haqoratlar na Vini, na boshqa birovga takrorlanmasligi uchun hamjihatlikda kurashish lozimligini qo'shimcha qildi.
Shuningdek, Navas Mbappe Prestiannini diskvalifikatsiya qilish kerakligi haqidagi fikriga ham munosabat bildirdi. U aniq qanday jazo bo'lishi kerakligini aytish qiyinligini, biroq bunday ishlar albatta jazolanishi shartligini, ataylab shunday so'zlarni ishlatadiganlarga nisbatan keskin choralar qo'llanishi zarurligini urg'uladi.
Vinisiusning yagona goli "Real"ga pley-offning ilk uchrashuvida "Benfika" ustidan 1:0 hisobida g'alaba keltirdi. Javob o'yini 25 fevral kuni bo'lib o'tadi.
“Zamin”ni Telegramʻda oʻqing!
