Ухандаги касалхона ҳамширалари коронавирусдан даволанаётган беморлар учун оммавий рақс уюштирди (видео)

^{Фото: Reuters}
Уханда коронавирус билан касалланганларни даволаш учун қурилган вақтинчалик касалхоналардан бирида ҳамширалар беморларни хурсанд қилиш мақсадида оммавий рақс уюштирди. «РИА Новости»нинг ёзишича, воқеа акс этган видео ижтимоий тармоқларда тез тарқалди ва бутун Хитой аҳолисида ижобий таассурот қолдирди.

Маълум бўлишича, ҳимоя кийимлари кийган икки нафар ҳамшира шифохонадаги беморларда кўтаринки руҳ пайдо қилиш мақсадида мусиқа қўйган ва Хитой қўшиғига монанд рақсга туша бошлаган. Мижозлар ҳам узоқ куттирмай, орадан бироз вақт ўтганидан кейин кимдир халатда, кимдир қалин устки кийимларда уларга қўшилиб рақсга тушган.

Ҳамширалардан бирининг айтишича, у ҳамкасблари билан бирга беморларни турғазиб бироз бадантарбия қилдириш ва касаликка курашишда кўтаринки кайфият бериш мақсадида шундай қилган.

Таъкидланишича, шифохонадаги беморлар коронавирусга чалинган бўлса-да, касаллик енгил шаклда кечмоқда. Шу сабабли бадантарбия ва рақс уларга фақат фойда келтиради.

Касалхонадаги рақсни бемор қизлардан бири видеога олиб, интернетга юклаган ва унга «мусиқа ва рақс одамлар юзида унутилган табассумни қайтараётгани»ни ёзиб қолдирган.

Эслатиб ўтамиз, янги турдаги коронавируснинг тарқалиш ўчоғига айланган Хитойнинг Ухань шаҳрида 2 февраль, якшанба куни, ушбу вирусни юқтирганлар учун мўлжалланган икки касалхонадан биринчисининг қурилиши якунланди. 4 февралдан бошлаб янги касалхона беморларни қабул қилишни бошлади.

11 февраль ҳолатига кўра, Хитойда ЖССТ қарорига мувофиқ вирус COVID-19 номини олган коронавирус оқибатида вафот этганлар сони 1110 кишидан ошиб кетди. Бутун мамлакат бўйлаб вирусни юқтириб олганлар сони 44 653 кишини ташкил этмоқда, уларнинг 4740 нафари даволанишга муваффақ бўлган. Бундан ташқари 8204 одам оғир аҳволда, касаллар билан алоқада бўлган яна 185 минг киши назорат остига олинган. “Замин” янгиликларини “Одноклассники”да кузатиб боринг