"4500 йиллик тарихга эга Гиза пирамидасининг асосий кириш эшиги ёнидан узунлиги тўққиз метр бўлган яширин йўлак топилди. Бу йўлак янги топилмаларга олиб бориши мумкин", дея хабар берди пайшанба куни Миср тарихий буюмлар департаменти Reuters агентлигига.
Пайшанба куни Nature журналида чоп этилган мақолада айтилишича, кашфиёт пирамиданинг қурилиши ва йўлак олдида жойлашган учли оҳактош конструкция ҳақидаги маълумотларнининг ортишига ҳисса қўшиши мумкин.
Буюк Пирамида монументал қабр сифатида милоддан аввалги 2560 йилларда, Фиръавн Хуфу ёки Хеопс даврида қурилган. Илк даврда 146 метр баландликда қурилган бўлиб, у ҳозир 139 метрни ташкил этади ва 1889 йилда Париждаги Эйфель минораси қурилгунига қадар дунёдаги энг баланд иншоот бўлган.
"Қурилиши тугалланмаган йўлак пирамиданинг оғирлигини қайта тақсимлаш ёки ҳали топилмаган хона учун яратилган бўлиши мумкин", деди Миср тарихий буюмлар Олий Кенгаши раҳбари Мустафо Вазирий.
"Биз нима қилишимиз мумкинлигини кўриш учун сканерлашни давом эттирамиз. Йўлакнинг ичида ёки охирида нима топишимиз мумкинлигини билишимз керак", деди у пирамида олдида бўлиб ўтган матбуот анжуманидан сўнг журналистларга.
Шунингдек, пирамиданинг бошқа қисмидаги қиролнинг дафн хонаси устидаги бешта хона массив структуранинг оғирлигини қайта тақсимлаш учун қурилган деб тахмин қилинади.
"Фиръавннинг бир нечта дафн хонаси бўлиши мумкин", дея қўшимча қилди Вазирий.
Олимлар коридорни космик нурларининг мюон рентгенографиясидан фойдаланиш ёрдамида кашф қилишган.
2017 йилда Scan Pyramids тадқиқотчилари томонидан пирамида ичида камида 30 метр узунликдаги бўшлиқ топилгани эълон қилинган эди. Бу XIX асрдан бери кашф этилган биринчи йирик ички тузилма ҳисобланади.
“Замин” янгиликларини “Telegram”да кузатиб боринг
