Украина ХХ раҳбари Қрим кўпригига ҳужумнинг баъзи тафсилотларини очиқлади

^{Фото: SERGEI MALGAVKO/TASS}

2022 йил 8 октябр куни Украина Россия Қримни қуруқлик билан боғловчи Керч кўпригини портлатган, бу 1,5 йиллик урушнинг энг катта воқеаларидан бирига айланганди. Украина кўприк портлашида алоқаси борлигини узоқ вақт сир сақлади, аммо кейинчалик портлашни урушнинг бир йиллигида амалга оширилган энг муваффақиятли операциялар қаторига киритди.

Украина хавфсизлик хизмати раҳбари Василий Малюк NV нашри билан суҳбатда кўприкни айнан Украина портлатгани, режа муаллифи ўзи бўлганини расман тасдиқлади.

«Махсус операция режасини мен ва икки ишонган ходимим ишлаб чиқиб, амалга оширдик», дейди Малюк. Унинг сўзларига кўра, портловчи қурилма оддий фуқаролик товари каби кўриниши ва текширув сканерларида пайқалмаслиги учун бир неча қават плёнка билан ўралган. Шунингдек, портловчи қурилма ортилган юк машинаси кўприкда махсус GPS-созламаларни ишдан чиқарувчи «глушител»ни ҳам енгиб ўтишга муваффақ бўлган.

Василик Малюк Украина хавфсизлик хизмати юкни Қрим кўпригигача қандай етказиб боргани ҳақида батафсил гапирмаган, лекин унинг сўзларига кўра, Россия томони портлашда алоқадорликда айблаб қўлга олган одамлар бу ҳақда ҳеч нарса билмаган.

«Биз [режани амалга ошириш учун] жаҳаннамни етти айландик, жуда кўп одамлардан сездирмай фойдаландик. Россия 22 кишини портлашда айблаб қамоққа тиққан, лекин улар операция ҳақида ҳеч нима билмаган, шунчаки кундалик ишлари билан шуғулланган, холос. Улар россиялик оддий контрабандачилар эди», дейди Малюк.

Расмий маълумотларга кўра, Қрим кўприги портлаши бўйича Россия томони 8 кишини қўлга олган, уларнинг барчаси портлашдан кейин бир ҳафта ичида ушланганди. Қўлга олинган одамларнинг адвокатлари BBC билан суҳбатда айтишича, иш бўйича айблов шунчаки тўғри келган одамларнинг бўйнига илинмоқда. Юк билан боғлиқ бўлган барча иштирокчилар ҳозирда терроризмда айбланяпти.

Россия президенти Владимир Путин кўприк портлашидан кейин чиқиш қилиб, буни «муҳим фуқаролик инфратузилмасини вайрон қилган» теракт деб атаган ва ташкилотчи Украина хавфсизлик хизмати бўлганини айтганди. Украина узоқ вақт портлашга алоқадор эканини рад этиб келди. Портлашдан кейин Украина президенти девони вакили Михайло Подоляк фургон Россия томонидан кўприкка киргани, портлаш учун жавобгарлик «назоратдан чиқиб кетган» россиялик кучишлатар тузилмалар гарданида эканини айтганди.

Портлашдан кейин кўприкнинг автомобил ҳаракатига мослашган қисми етти ой ўтибгина очилганди.

«Денгиз болакайи» билан иккинчи портлаш

2023 йил 17 июл куни Қрим кўпригида иккинчи портлаш амалга оширилди. Бу гал Россиянинг иддаоси бўйича сув остидан, сув устидан, ҳаводан ва космосдан туриб қўриқланадиган кўприк оддий қўлбола сувусти дрони ёрдамида портлатилди. Василий Малюк интервюсида ушбу иккинчи портлаш ҳақида ҳам бироз гапирган.

Унинг сўзларига кўра, иккинчи портлашда Украина ўзи ясаган «Денгиз болакайи» (Sea baby) сувусти дронидан фойдаланган. Унга 850 кг миқдорида портловчи модда юкланган. Ушбу ҳужумда Украина хавфсизлик хизматининг «Ҳантер» (овчи) чақирув номидаги офицери катта ишни амалга оширган. Малюкнинг сўзларига кўра, айнан мана шу офицер дронга 850 кг.гача портловчи модда юклашни уддалаган ва бошқарув тизимини модернизация қилган. Ҳужумда фойдаланилган дронни ясашга бир неча ой вақт кетган.

Иккинчи портлаш натижасида Қрим кўпригининг 145-устуни қулаган, кўприкда яна ҳаракат тўхтатилганди. Россия портлаш кунидаёқ ҳужумни Украина томони сувусти дронлари ёрдамида амалга оширганини билдирганди. Бу портлашда ҳам Украина алоқадор эканини тезда тан олмаган, аммо портлаш арафасида Украина қуруқлик қўшинлари қўмондони, генерал Олександр Сирский ва Укараина хавфсизлик хизмати каналларида қолдирилган постлар бу ишни айнан украинлар қилганидан далолат эди.

BBC ушбу портлаш ҳақида Украина хавфсизлик хизматига расман сўров юборган ва «Барча тафсилотлар ғалабадан кейин оқичланади» деган жавоб олган.

Россия босқини рамзи

Қрим кўприги Россия Украинага тегишли яриморолни аннексия қилганидан кейин, 2018 йил май ойида очилганди. Уруш давомида бу кўприк Россиянинг Украина шарқига қурол ва ҳарбийларни етказишдаги асосий йўналиши бўлди. Украина томони кўприкни Россия босқини ва Қрим аннексияси рамзи деб атайди.

Кўприкда доимий равишда турли ҳарбий машғулотлар ўтказиб келинади. Шунингдек, кўп марта Украина армиясининг кўприкка ҳаводан қилинган дронлар ҳужуми бартараф этилган. Ўтган йил октябр ойида амалга оширилган портлашдан кейин кўприкка қайта ҳужум қилиш имконсиздек кўринган, чунки кўприк назорати тўлалигича ФСБ тасарруфига ўтказилганди. Шу боис, Қрим кўпригига қилинган иккинчи портлаш унга етказилган зарар тезда бартараф этилганига қарамай, жуда характерли воқеа деб қаралмоқда.

Янгиликлар