Илон Маск сиёсатдан чекинди — “Энди вақтни Марсга сарфлайман”

Илон Маск ўз сиёсий фаолиятини тўхтатишга қарор қилди. The Washington Post нашрининг манбаларига таяниб хабар беришича, бизнесмен бу қарорни бир неча сабаблар, жумладан, натижага эришишдаги қийинчиликлар ва шахсий хавфсизликка бўлган таҳдидлар туфайли қабул қилган. АҚШ ҳукуматидаги самарадорлик департаменти (DOGE) раҳбари сифатидаги вазифасидан кейинги бу бурилиш сиёсий саҳнада катта шов-шувларга сабаб бўлди.

Сиёсатдаги саргузаштга чек қўйилди

Илон Маск сиёсатни тарк этиш ниятини ҳафта бошида эълон қилди. Қатарда бўлиб ўтадиган Иқтисодий форум арафасида Bloomberg агентлигига берган интервьюсида у сиёсий фаолликни пасайтиришини, эътиборни яна Tesla’га қаратишини билдирди. Унинг таъкидлашича, 2008 йилдан бери раҳбарлик қилиб келаётган автогигантга яна жиддий ёндашиш вақти келди: “Менимча, етарлича сиёсий иш қилдим”, — деди у.

The Washington Post манбаларига кўра, сўнгги бир йил давомида Маск АҚШ сиёсий муҳитининг марказида бўлиб келган. Аммо охирги ойларда у сиёсий жараёнлардан чарчаган ва сарфлаган маблағларининг амалда кутилган натижаларни бермаганидан руҳи тушган. Шу билан бирга, шахсий ва оилавий хавфсизлик билан боғлиқ омиллар унинг сиёсатдан чекиниш қарорини тезлаштирган.

Шахсий ҳужумлар ва Tesla’га босимлар

NBC News тарқатган маълумотларга кўра, Маск DOGE раҳбари бўлганидан сўнг Tesla объектларига нисбатан ўнлаб вандализм ҳолатлари қайд этилган. Бир неча ҳафта ичида компанияга тегишли электромобиллар, дилерлик марказлари ва қувватлаш станциялари ҳужумга учраган. Президент Доналд Трамп бу ҳужумларни амалга оширганларни "террорчилар" деб атаган.

Маскнинг сиёсий аренадаги чиқишлари нафақат шахсий ҳаёти, балки бизнесига ҳам салбий таъсир кўрсатган. У DOGE раҳбари сифатида давлат ходимларини оммавий равишда ишдан бўшатгани учун танқидлар ёғди. Маскнинг шахсан Трампга яқинлиги, унинг 2024 йилги сайловолди кампаниясига 250 миллион доллардан ортиқ маблағ ажратгани жамоатчиликда икки томонлама муносабатни юзага келтирди.

Бозорда акс этган таъсир

2024 йилда Tesla акциялари 60% ўсган бўлса-да, 2025 йил бошидан буён улар 55% арзонлашган. Инвесторлар Маскнинг сиёсий фаолияти бизнесга салбий таъсир кўрсатаётганидан ташвишга тушмоқда. Кўплаб таҳлилчиларнинг фикрича, Маскнинг сиёсатдан чекиниши компаниялар фаолиятида барқарорликни тиклашга ёрдам бериши мумкин.

Марс сари навбатдаги қадам?

Яқинлари ва маслаҳатчилари таъкидлашича, Маск энди диққатини ўзининг асосий лойиҳалари — Tesla, SpaceX ва “Марс экспедицияси”га қаратмоқчи. “Капитолийдаги сиёсат энди иш бермаяпти. Вақтни ютиб бўлдик, энди Марсга учиш ҳақида ўйлаш вақти келди”, — дейди манбалари орқали тарқалган сўзлар.

Хулоса қилиб айтганда, Илон Маскнинг сиёсатдан чекиниши фақат шахсий қарор эмас, балки глобал йўналиш ўзгаришидир. Унинг “сиёсий саёҳати” АҚШдаги сиёсий муҳит, техноолигархлар таъсири ва шахсий хавфсизлик каби кўплаб масалаларни яна бир бор кун тартибига олиб чиқди. Энди эса диққат бутунлай бошқа юзланишда — Марс сари. «Замин»ни Telegram’да ўқинг!