Тожикистонда иқлим ўзгаришининг яна бир таъсири кузатилди — Исмоил Сомоний тизмасидаги йирик музликнинг бир қисми ажралиб, пастга томон ҳаракатланди. Фавқулодда вазиятлар хизмати маълумотига кўра, ҳодиса 25 октябрь куни соат 11:00 ларда Тожикобод туманидаги Калаи Лаби Об қишлоқ жамоати ҳудудида, Сафтаб қишлоғи яқинида қайд этилган.
Аниқланишича, ажралиб тушган музликнинг узунлиги тахминан 2 километр, баландлиги 25 метр ва кенглиги 150–200 метр атрофида бўлган. Йирик муз қатлами дара бўйлаб пастга сурилиб тушганига қарамай, ҳодиса аҳоли ва маҳаллий инфратузилмага зарар етказмаган, ҳеч ким жабр кўрмаган ва ҳодиса оқибатларсиз якунланган.
Мутахассислар бу жараённи сўнгги йилларда кузатилаётган глобал иқлим ўзгаришлари ва ҳаво ҳароратининг барқарор ошиши билан боғлашмоқда. Илгари бундай кўчишлар асосан Ҳиндистон ёки Непалнинг баланд Ҳимолай тоғларида кузатилган бўлса, эндиликда Марказий Осиё музликларида ҳам бу ҳолат тез-тез учрамоқда.
Гляциологлар фикрича, агар яқин кунларда кучли ёмғир ёғса ёки ҳарорат яна кўтарилса, музликнинг яна бир қисми ажралиб тушиши эҳтимолдан ҳоли эмас. Бу эса айниқса Қаса-и-Наби қишлоғи яқинидаги Гулрез жамоатида фаолият юритувчи фермер хўжаликларига маълум хавф туғдириши мумкин.
Мутахассислар ҳисоб-китобига кўра, ушбу музлик бутунлай эриб кетган тақдирда тахминан 7–8 миллион куб метр атрофидаги сув ҳосил бўлади. Бироқ бу жараён босқичма-босқич кечиши кутилмоқда ва ҳозирча кескин сув тошқини хавфи мавжуд эмас.
Ҳодиса иқлим ўзгаришининг тоғ музликларига таъсири янада кучайганини кўрсатмоқда. Олимлар бу каби жараёнлар келгусида яна кўпаяди, деб ҳисобламоқда ва ҳудудлардаги экологик хавфларни мунтазам мониторинг қилиш зарурлигини таъкидламоқда.
“Zamin”ни Telegram'да ўқинг!
